УИХ-ын Инновац, цахим бодлогын байнгын хорооны өнөөдрийн хуралдаанаар “Мэдээллийн технологийн үйлдвэрлэлийг дэмжих тухай” хуулийн хэрэгжилтийн бодит байдалд дүн шинжилгээ хийх, тулгарч буй хүндрэл бэрхшээлийг тодорхойлох, нийгэмд үзүүлж буй эерэг ба сөрөг нөлөөллийг үнэлэх, шаардлагатай бол хуульд өөрчлөлт оруулах зорилго бүхий ажлын хэсгийн удирдамжийг баталлаа.
Ажлын хэсэг нь 2025 оны намрын чуулганы хугацаанд ажиллах бөгөөд шаардлагатай тохиолдолд хугацааг сунган ажиллаж болох юм. Түүнчлэн төрийн болон хувийн хэвшлийн байгууллагууд, мэргэжлийн холбоод, эрдэмтэн судлаачдыг оролцуулан, олон улсын туршлагыг судлан харьцуулалт хийх боломжтой аж.
Байнгын хорооны дарга, УИХ-ын гишүүн Ж.Золжаргал хуулийн хэрэгжилттэй холбогдуулан дараах хуулиудад нэмэлт, өөрчлөлт оруулах шаардлагатайг танилцууллаа. Үүнд:
-
Нийтийн мэдээллийн ил тод байдлын тухай хууль
-
Мөнгө угаах болон терроризмын санхүүжилттэй тэмцэх тухай хууль
-
Харилцаа холбооны тухай хууль
-
Аж ахуйн нэгжийн орлогын албан татварын тухай хууль
-
Хөрөнгийн үнэлгээний тухай хууль зэрэг багтаж байгаа юм.
Мөн дараах дүрэм, журмуудад өөрчлөлт хийх шаардлагатайг дурдав. Үүнд:
-
Мэдээллийн технологийн үйлдвэрлэлийг дэмжих виртуал бүсийн ажиллах журам
-
Виртуал бүсэд бүртгэлтэй хуулийн этгээдэд үзүүлэх татварын болон татварын бус дэмжлэгийн журам
-
Хиймэл оюун ухаан, их өгөгдөл, блокчэйн, сансрын үйлдвэрлэл зэрэг дэвшилтэт технологид суурилсан сэндбоксын зохицуулалт зэрэг болно.
Эх сурвалж: УИХ-ын Хэвлэл мэдээллийн газар
