АНУ-ын Ерөнхийлөгч Дональд Трамп болон “Tesla” компанийн гүйцэтгэх захирал Илон Маск нарын хооронд үүссэн маргаан ширүүсч, үүний улмаас “Tesla”-гийн хувьцааны ханш 14 хувиар унаж, компанийн зах зээлийн үнэлгээ 150 тэрбум доллароор багаслаа.
Маргааны эх үүсвэр нь Д.Трампын “Truth Social” платформ дээр нийтэлсэн мэдэгдэл байв. Тэрбээр “Төсвийг олон тэрбум доллароор хэмнэх хамгийн хялбар арга бол Илоны засгийн газрын татаас, гэрээнүүдийг цуцлах явдал” хэмээн мэдэгдсэн нь И.Маскийн удирдаж буй компаниудыг шууд онилсон дайралт байлаа.
Энэ мэдэгдлийн дараахан “Tesla”-гийн хувьцааны ханш огцом унаж, компанийн 1.1 их наяд долларын үнэлгээ 950 тэрбум орчим болж буурсан байна. Үүний зэрэгцээ дэлхийн хамгийн баян хүн гэгддэг И.Маскийн хөрөнгө мөн 34 тэрбум доллароор буурч, энэ нь түүний хувьд 2021 оны арваннэгдүгээр сараас хойших хамгийн их алдагдлын хоёр дахь тохиолдол болсон гэж “Bloomberg” мэдээлжээ.
Гэсэн ч “Tesla” болон “SpaceX” зэрэг олон салбарт ноёрхсон бизнесүүдтэй И.Маск зургаадугаар сарын 5-ны байдлаар 334 тэрбум долларын хөрөнгөтэй хэвээр байгаа бөгөөд дэлхийн хамгийн баян хүний байр сууриа хадгалсаар байна.
Эх сурвалж: CNN, Bloomberg
