Санхүүгийн зохицуулах хороо (СЗХ) болон Олон улсын санхүүгийн корпораци (ОУСК) тогтвортой, ногоон санхүүгийн зах зээлийг хөгжүүлэх зорилгоор хамтын ажиллагааны санамж бичиг байгууллаа. Энэхүү санамж бичгийн хүрээнд талууд байгаль орчинд ээлтэй төсөл, хөтөлбөрийг дэмжих, шинэлэг санхүүжилтийн хэрэгслүүдийг нэвтрүүлэх, нийгэм, засаглалын шалгуурыг хэрэгжүүлэх зэргээр хөрөнгийн зах зээлийг дэмжин хөгжүүлэхээр төлөвлөж байна.

Үүний зэрэгцээ үнэт цаас гаргагчид, хөрөнгө оруулагчид болон бусад оролцогч талуудын тогтвортой хөгжлийн талаарх мэдлэг ойлголтыг нэмэгдүүлж, чадавхыг сайжруулах, мөн тогтвортой байдлын тайлагналын удирдамжийг олон улсын стандартын дагуу шинэчлэх ажлыг зохион байгуулна.

СЗХ-ны дарга Т.Жамбаажамцын хэлснээр, энэ хүрээнд “Ногоон санхүүгийн зах зээлийг хөгжүүлэх” төслийн хоёрдугаар үе шатыг албан ёсоор эхлүүлж буй. Төслийн хүрээнд ногоон бондоос гадна зорилгодоо хүрч чадаагүй тохиолдолд бондын хүү нэмэгдэх, нэмэлт төлбөр төлөх нөхцөлтэй тогтвортой хөгжлийн бонд зэрэг шинэ төрлийн санхүүгийн бүтээгдэхүүн нэвтрүүлэхээр ажиллаж байна.

Эдгээр шинэ бүтээгдэхүүнүүдийг зах зээлд нэвтрүүлснээр байгаль орчинд ээлтэй хөрөнгө оруулалтыг татах, санхүүжилтийн эх үүсвэрийг төрөлжүүлэх боломж бүрдэх юм.

Талууд 2020 онд мөн ногоон санхүүгийн чиглэлд хамтын ажиллагааны анхны санамж бичиг байгуулж байсан бөгөөд шинэчилсэн хэлэлцээр нь өмнөх ажлуудыг гүнзгийрүүлэн үргэлжлүүлэх зорилготой.

Эх сурвалж: Санхүүгийн зохицуулах хороо