Улаанбаатар хотын метро төслийн зөвлөх үйлчилгээ үзүүлэгчийг сонгох олон улсын нээлттэй тендерийг хоёр үе шаттай зохион байгуулж, нийт дөрвөн компанийн өрсөлдөөнөөс БНСУ-ын Dohwa Engineering Co. Ltd, “Korea National Railway”, “Soosung Engineering”, “Korea Railroad Corporation” компаниудын түншлэл шалгарсан байна. Энэ зөвлөх баг нь төслийн техник, эдийн засгийн үндэслэл (ТЭЗҮ)-ийг шинэчилж, суурь судалгаа, зураг төсөл, барилга угсралтын ажилд мэргэжлийн зөвлөгөө өгөхөөс гадна хэрэгжилтийн явцад хяналт, мониторингийн үйлчилгээ үзүүлж байна.

2013 онд Японы ЖАЙКА-аас боловсруулсан анхны ТЭЗҮ-ийг шинэчлэн 2025 оны гуравдугаар сард батлуулсан. Шинэчилсэн төслөөр Толгойт–Амгалан чиглэлд нийт 19.4 км урттай, 15 өртөө, 1 депотой шугам байгуулах бөгөөд цагт 17,200 зорчигч тээвэрлэх хүчин чадалтай байна гэж тооцоолсон.

Уг төслийг хэрэгжүүлснээр:

• Авто замын сүлжээний ачаалал 10 хувиар буурна

• Нийтийн тээврийн дундаж хурд 18 хувиар нэмэгдэнэ

• 45 минут зарцуулдаг маршрутыг 15 минутад туулах боломж бүрдэнэ

• Өртөө орчмын жижиг, дунд бизнесийг дэмжих үр нөлөөтэй байх тооцоо гарсан

Одоогоор бүтээн байгуулалтын гүйцэтгэгчийг сонгох олон улсын тендерийн эхний үе шат дуусч, 6 улсын 27 оролцогч материалаа ирүүлээд байна. Хоёрдугаар үе шатанд эдгээр 27 оролцогчоос шалгаруулалт үргэлжилнэ.

Мөн төслийн санхүүжилттэй холбоотойгоор олон улсын байгууллагуудтай хэлэлцээ хийж, байгаль орчин, нийгмийн нөлөөллийн ерөнхий үнэлгээг боловсруулах ажлыг олон улсын зөвлөхүүдтэй хамт эхлүүлсэн байна.

Эх сурвалж: Улаанбаатар метро төслийн ажлын алба