Нийслэлийн 9 дүүргийн 40 байршилд зохион байгуулж буй нөөцийн махны өргөтгөсөн худалдаа 2025 оны тавдугаар сарын 31-нээс зургадугаар сарын 6-ныг дуустал үргэлжилнэ. Уг худалдаагаар махыг хямдралтай үнээр борлуулж, иргэдийн хүнсний хэрэгцээнд бодит дэмжлэг үзүүлж буй.

Хонины махыг гулуузаар нь нэг килограммыг 10,000 төгрөгөөр, харин үхрийн махыг нэг килограммыг 13,000 төгрөгөөр худалдаалж байна. Иргэдэд ойр, хүртээмжтэй байлгах үүднээс худалдааг 40 байршилд зэрэг зохион байгуулж байгаа бөгөөд байршил тус бүрт нийлүүлэлтийн тогтвортой байдал, чанарыг хангах зорилготой гэж албаныхан мэдэгдлээ.

Махны нийлүүлэлтийг “Нөөцийн мах бэлтгэгч” аж ахуйн нэгжүүдээр дамжуулан хийж байгаа бөгөөд хэрэглэгчдэд гулууз махаар илүү хүртээмжтэй үнээр хүргэх нь худалдааны гол зорилго юм. Худалдан авахдаа иргэд махны чанар, хадгалалтын нөхцөлийг сайтар анхаарч, зориулалтын сав, ууттай ирэхийг холбогдох байгууллагууд зөвлөж байна.

Эх сурвалж: НЗДТГ