Багахангай өртөөнөөс Хөшигийн хөндий чиглэлд баригдаж буй салбар төмөр замын ажлын явцтай холбогдуулан Зам, тээврийн хөгжлийн яамнаас газар дээр нь очиж танилцан, бүтээн байгуулалтын ажлыг эрчимжүүлэх чиглэлээр “Монголын Төмөр зам” ТӨХК болон гүйцэтгэгч байгууллагуудад тодорхой үүрэг, чиглэл өглөө.

Шинээр баригдаж буй энэхүү салбар төмөр зам нь Багахангай өртөөнөөс салаалж, Төв аймгийн Сэргэлэн сумын нутаг дэвсгэрээр дамжин Хөшигийн хөндийд хүрэх бөгөөд нийт урт нь 102 км байх юм. Уг төмөр зам нь 3 өртөө, 4 зөрлөг, 2.5 км урт гүүрэн байгууламжтай, дан замаар төлөвлөгдсөн. Энэ нь Хөшигийн хөндийн олон улсын нисэх буудлыг төмөр замаар холбох, ачаа тээвэр, зорчигч урсгалыг сайжруулах, бүс нутгийн хөгжилд чухал түлхэц болох ач холбогдолтой гэж үзэж байна.

Төслийн барилгын ажилд нийтдээ 110 орчим үндэсний аж ахуйн нэгж, 2500 гаруй инженер, ажилтнууд оролцохоор төлөвлөсөн. Барилгын ажлыг 2025 оны дөрөвдүгээр сарын сүүлчээр эхлүүлсэн бөгөөд есдүгээр сар гэхэд бүрэн дуусгах зорилго тавьж, бүтээн байгуулалтыг 24 цагаар үргэлжлүүлэн гүйцэтгэж байна гэж Зам, тээврийн хөгжлийн яам мэдээллээ.

Эх сурвалж: Зам, тээврийн хөгжлийн яам, Монголын Төмөр зам ТӨХК