Вьетнамын Soha хэвлэлийн мэдээлснээр, Бээжин сүүлийн саруудад Австралийн улаан буудайн импортоо мэдэгдэхүйц бууруулж, оронд нь ОХУ-аас үр тарианы нийлүүлэлтээ нэмэгдүүлж байгаа нь олон улсын зах зээлд анхаарал татаж байна. Хятад улсын үр тарианы импортод эзлэх Оросын хувь хэмжээ өссөөр байгаа бөгөөд энэ нь хоёр улсын эдийн засгийн харилцаа гүнзгийрч буйн илрэл хэмээн ажиглагчид дүгнэж байна.

Австралийн талаас Хятадын зах зээлд нийлүүлсэн улаан буудайн хэмжээ 2024 оны аравдугаар сараас 2025 оны гуравдугаар сар хүртэлх хугацаанд зөвхөн 546 мянган тонн болсон бол ОХУ энэхүү хоосон орон зайг идэвхтэй нөхөж, экспортын хэмжээгээ нэмэгдүүлсээр байна.

Хятадын хувьд гадаад худалдаанд стратегийн түншлэл, эрсдэл багатай, хямд үнэтэй нийлүүлэгчдийг илүүд үзэх болсон нь тус улсын импортыг зохион байгуулж буй бодлоготой уялдаж байгаа бөгөөд Оросын тал энэ нөхцөл байдалд илүү уян хатан хандсан гэж шинжээчид үзэж байна. Эрэлт харьцангуй буурсан ч ОХУ өрсөлдөхүйц үнийг санал болгож, тогтмол нийлүүлэлт хийсээр байгаа нь Хятадын зүгээс итгэл хүлээх шалтгаан болжээ.

Ийнхүү Бээжингийн үр тарианы зах зээлд Орос давамгайлах байр суурь эзэлж, Австралийн байр суурийг түр шахаж буй нь хоёр улсын геополитик болон худалдааны стратегиудад тодорхой нөлөө үзүүлж эхэллээ.

Эх сурвалж: Soha, Izvestia