Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн тариалангийн бүс нутагт ажиллах үеэрээ хүнсний ногоо үйлдвэрлэгчидтэй уулзаж, тэдний санал бодлыг сонсон, төрөөс үзүүлж буй дэмжлэг, урамшууллын талаар дэлгэрэнгүй танилцуулав.

Орхон аймагт үйл ажиллагаа явуулж буй “Орхон түшиг ургац” компани 10 га талбайд тарвас тарихаар төлөвлөснөөс 6 га-д нь эрт ургацын тарвас тарьж, долдугаар сарын 15-наас эхлэн худалдаанд гаргахаар ажиллаж байна. Тус компанийн тариаланчид хүлэмжинд тарьсан үрсэлгээгээ талбайд шилжүүлэн суулгаж, богино хугацаанд боловсорч гүйцэх тарвасыг зах зээлд гаргах бэлтгэлээ хангажээ.

Мөн тус компанийн хувьд төмс, лууван, манжин зэрэг хүнсний ногоог хийн үрлэгч ашиглан тарьж эхэлсэн нь техникжсэн аргаар намар комбайнаар шууд хураах боломжийг олгож байгаа юм. Энэ нь ургац хураалтын үеийн хүний нөөцийн асуудлыг шийдвэрлэх, хураалтын зардлыг бууруулах, улмаар хэрэглэгчдэд хямд өртөгтэй, дотооддоо тариалсан шинэ ногоо хүргэх нөхцөлийг бүрдүүлж байна.

Ногоочдын зүгээс сүүлийн гурван жилд “Хүнсний хувьсгал” хөдөлгөөний хүрээнд хүнсний ногооны салбарт олгож буй дэмжлэг, урамшуулал нь бодит үр дүн өгч, тариалалтын хэмжээ эрс өссөн талаар онцлон дурдсан юм. Зарим нэр төрлийн хүнсний ногоогоор дотоодын хэрэгцээг 100 хувь хангах боломжтой болсон нь энэ бодлогын үр дүн гэдгийг тэд хэлж байлаа.

Төрөөс үзүүлж буй урамшуулал нь зөвхөн үйлдвэрлэлийг дэмжээд зогсохгүй, нэмүү өртгийн сүлжээгээр дамжуулан хэрэглэгчид хүртэлх үнэд эерэгээр нөлөөлж, хүнсний аюулгүй байдлыг хангах үндэс суурь болж байгааг талууд санал нэгтэйгээр тэмдэглэв.

Эх сурвалж: ХХААХҮЯ