Монголын Үндэсний Худалдаа Аж Үйлдвэрийн Танхим (МҮХАҮТ) болон “Голомт” банк эмэгтэй бизнес эрхлэгчдийн өрсөлдөх чадвар, санхүүгийн хүртээмжийг нэмэгдүүлэх, чадавхжуулах зорилгоор хамтран ажиллах санамж бичиг байгууллаа.

Хамтын ажиллагааны хүрээнд талууд “Цахим эдийн засаг дахь эмэгтэй экспортлогчдыг дэмжих” төсөлд шалгарсан, эмэгтэй удирдлагатай аж ахуй нэгжүүдийг зах зээл, мэдээлэл, хөрөнгө оруулалт, сургалтын боломжоор хангаж, олон улсын бизнесийн орчинд амжилттай оролцох нөхцөл бүрдүүлэхэд анхаарах юм. Мөн жендерийн тэгш оролцоог дэмжих бодлогын өмгөөлөлд хамтран ажиллахаар тохиролцжээ.

Энэхүү төсөл нь Дэлхийн худалдааны байгууллага болон Олон улсын худалдааны төвийн хамтын санаачилга бөгөөд нийт 50 сая ам.долларын санхүүгийн дэмжлэгтэй хэрэгжиж байна. Төсөлд хамрагдсан эмэгтэй бизнес эрхлэгчид техникийн туслалцаа, менторшип, олон улсын бизнесийн сүлжээнд нэвтрэх сувгаар дамжуулан бизнесээ өргөжүүлэх боломжтой болно.

Эх сурвалж: МҮХАҮТ