Монополын эсрэг газраас 2025 оны тавдугаар сарын 26-ны өдрийн 03 дугаартай удирдамжийн дагуу бүх төрлийн шатахуун импортлогч, жижиглэн болон бөөний худалдаа эрхлэгч аж ахуйн нэгжүүдийг хамруулсан хяналт шалгалтыг эхлүүллээ.

Хяналт шалгалтыг Өрсөлдөөний зохицуулалт, зах зээлийн судалгааны газрын дарга П.Номин-Эрдэнэ ахалж байгаа бөгөөд ажлын хэсэг дараах чиглэлд ажиллаж байна:

• Шатахуун импортлогч, худалдаа эрхлэгч аж ахуйн нэгж тус бүрийн үнэ бүрдэлтийн мэдээлэлд судалгаа, шинжилгээ хийх

• Өрсөлдөөний тухай хууль болон холбогдох бусад хууль, дүрэм, журмыг зөрчсөн эсэхийг шалгах

• Илэрсэн зөрчилд арга хэмжээ авах, зөрчлийг арилгуулах, хуулийн дагуу захиргааны хариуцлага хүлээлгэх

• Шалгалтын дүн мэдээг нэгтгэн, шаардлагатай тохиолдолд холбогдох байгууллагуудад санал хүргүүлэх

Энэхүү шалгалт нь шатахуун импорт, нийлүүлэлтийн зах зээлд үнийн хэлбэлзэл, хэт давсан ашиг, зах зээлийн ноёрхлын эрсдэл байгаа эсэхийг тодорхойлох, шударга өрсөлдөөний орчныг хангах зорилготой юм. Иргэдийн өргөн хэрэглээний бүтээгдэхүүн болох шатахууны үнийн бодит байдал, үүсгэж болзошгүй үнийн хөөрөгдлийг таслан зогсооход хяналт чиглэж байгаа гэж холбогдох албаныхан мэдээллээ.

Эх сурвалж: Монополын эсрэг газар