Санхүүгийн зохицуулах хорооны тусгай зөвшөөрөлтэй 575 Банк бус санхүүгийн байгууллага (ББСБ) 2025 оны эхний улиралд үйл ажиллагаа явуулж байгаа нь өмнөх оны мөн үетэй харьцуулахад 8.3 хувиар өссөн үзүүлэлт болжээ. Үүнээс 95.1 хувь нь үндэсний хөрөнгө оруулалттай, 4.9 хувь нь гадаадын хөрөнгө оруулалттай байна.

ББСБ-уудын үйл ажиллагааны эх үүсвэрт өр төлбөр 48.7 хувь, өөрийн хөрөнгө 51.3 хувь-ийг эзэлж байна. Өмнөх онтой харьцуулахад:

• Итгэлцлийн үйлчилгээний эх үүсвэр 57.6 хувиар,

• Банк, санхүүгийн байгууллагаас татсан хөрөнгө хоёр дахин,

• ББСБ-аас гаргасан өрийн бичиг 79.4 хувиар тус тус өссөн нь санхүүжилтийн бүтэц, зохион байгуулалтад ихээхэн өөрчлөлт гарсныг харуулж байна.

Гадаадын хөрөнгө оруулалттай 28 ББСБ үйл ажиллагаа явуулж байгаа бөгөөд:

• 13 нь Японы,

• 7 нь БНСУ-ын,

• 2 нь АНУ-ын,

• бусад нь Их Британи, Канад, Малайз, Сичелл, БНХАУ зэрэг орны хөрөнгө оруулалттай юм.

Эдгээр ББСБ-ууд нь салбарын нийт хөрөнгийн 12.6 хувийг эзэлдэг ч харилцагчдын 5.8 хувьд л үйлчилдэг нь гадаадын хөрөнгө оруулалттай ББСБ-уудын хэмжээ, нөлөө харьцангуй төвлөрсөн байгааг илтгэнэ.

ББСБ-ын нийт хөрөнгө Монгол Улсын ДНБ-ийн 8.9 хувийг бүрдүүлж байгаа бөгөөд салбарын нийт зээлийн хэмжээ 6 их наяд 325 тэрбум 300 сая төгрөгт хүрсэн байна. Энэ нь:

• 2024 оны мөн үеэс 2.2 их наяд төгрөгөөр,

• 2021 оноос 4.4 их наяд төгрөгөөр тус тус нэмэгдсэн үзүүлэлт болжээ.

Ийнхүү ББСБ-ын салбарын өсөлт нь дотоодын хөрөнгө оруулалт давамгайлсан, гадаадын хөрөнгө оруулалт тогтвортой өсч байгаа, эх үүсвэрийн бүтэц өөрчлөгдөж, зах зээлийн оролцоо өргөжиж буйг илтгэж байна.

Эх сурвалж: Санхүүгийн зохицуулах хороо