Монгол Улсын “Буянт Төв” компани болон ОХУ-ын “Клевер Фармер” компани газар тариалангийн ухаалаг системийг туршилтаар нэвтрүүлэх чиглэлээр хамтран ажиллахаар харилцан ойлголцлын санамж бичиг байгууллаа. Энэхүү баримт бичигт 2025 оны тавдугаар сарын 23-ны өдөр гарын үсэг зурсан бөгөөд Монголын газар тариалангийн салбарт технологид суурилсан шинэ үеийг эхлүүлэх томоохон алхам болж байна.
“Клевер Фармер” компани нь Оросын газар тариалангийн салбарт ухаалаг технологи, хяналтын нэгдсэн систем амжилттай хэрэгжүүлсэн туршлагатай бөгөөд одоо Монголын нөхцөлд тохирсон хувилбарыг туршин нэвтрүүлэхэд “Буянт Төв” компанитай хамтран ажиллаж байна. Уг систем нь цаг агаар, хөрсний бүтэц, талбайн онцлог зэрэг олон хүчин зүйлийг ухаалаг технологийн тусламжтайгаар үнэлэн дүгнэж, га тутмаас авах ургацын хэмжээг нэмэгдүүлэх боломж бүрдүүлнэ.
Цаашлаад тариаланчид хөрс боловсруулах, үр суулгах, бордоо цацах, ургамал хамгаалах, ургац хураах зэрэг бүх үе шатыг тоон өгөгдөлд тулгуурлан, шинжлэх ухаанчаар гүйцэтгэх нөхцөлтэй болох юм. Энэ нь Монгол орны өвөрмөц уур амьсгалд тохирсон үр дүнтэй технологиудыг газар тариалангийн салбарт ашиглах боломжийг нэмэгдүүлнэ.
Санамж бичгийн үйл ажиллагаанд Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн, Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнэ, Гадаад хамтын ажиллагааны хэлтсийн ахлах мэргэжилтэн Э.Эрдэнэтөгс нар оролцсон байна.
Эх сурвалж: Хүнс, хөдөө аж ахуй, хөнгөн үйлдвэрийн яам
