Европын сэргээн босголт, хөгжлийн банк (ЕСБХБ)-ны 2025 оны жилийн уулзалт, бизнес форум Английн Лондон хотод энэ сарын 13-15-ны өдрүүдэд зохион байгуулагдаж, 2026–2030 оны гурав дахь стратегийн төлөвлөгөөг баталлаа. Энэ удаагийн чуулга уулзалтаар банкны үйл ажиллагааг Сахарын цөлийн өмнөд бүс болон Африкийн орнуудад тэлэх хүрээнд Бенин, Кот д’Ивуар, Нигери улсыг банкны хүлээн авагч улс хэмээн албан ёсоор баталжээ.
Монгол Улсын хувьд ЕСБХБ-ны анхааралтай хамтын ажиллагааны чиглэлд хэвээр байгаа бөгөөд тус банкнаас 2024 онд 264 сая еврогийн хөрөнгө оруулалт хийсэн нь өмнөх оны 143 сая евротой харьцуулахад бараг хоёр дахин нэмэгдсэн үзүүлэлт юм.
Тус уулзалтад Монголын банк, санхүү, боловсруулах үйлдвэрлэл, үйлчилгээний салбарын хувийн хэвшлийн байгууллагууд оролцсон бөгөөд Хаан банк Европын банкнаас 145 сая ам.долларын хэлцэл байгуулсан байна. Энэ нь Монгол Улсын санхүүгийн салбарт ЕСБХБ-наас олгож байсан хамгийн өндөр дүнтэй санхүүжилт болж буйг Сангийн яам онцоллоо.
Өнөөгийн байдлаар ЕСБХБ Монгол Улсад нийтдээ 2.6 тэрбум еврогийн хөрөнгө оруулалт хийсэн бөгөөд үүний 74 хувийг хувийн хэвшилд чиглүүлсэн байна. Энэ нь тус банк Монголын эдийн засгийн өсөлтийг дэмжих, хувийн хэвшлийг чадавхжуулах зорилтоо тууштай үргэлжлүүлж буйг илтгэж байна.
Эх сурвалж: Сангийн яам, ЕСБХБ
