Тариалангийн үйлдвэрлэл эрхэлж буй иргэн, аж ахуйн нэгжүүдийн үйлдвэрлэсэн бүтээгдэхүүнд мөнгөн урамшуулал олгох, мөн мөнгөн бус дэмжлэг үзүүлэх журам хэрэгжиж эхэлж байгаа талаар Хүнс, хөдөө аж ахуй, хөнгөн үйлдвэрийн яамнаас мэдээллээ. Хүнсний ногоо тариалагчид энэ хүрээнд зургаадугаар сарын 1-нээс урамшууллаа авах боломжтой болж байна.

Урамшуулалд хамрагдах хүнсний ногооны төрөлд:

• Байцаа

• Сонгино

• Саримс

• Чинжүү

• Улаан лооль

• Өргөст хэмх

• Навчит ногоо багтаж байгаа бөгөөд

• Боловсруулах үйлдвэрт нийлүүлсэн тохиолдолд шар лууван, хүрэн манжин мөн багтана.

Урамшуулалд хамрагдахын тулд дараах шаардлагуудыг хангасан байх шаардлагатай:

• Өөрийн өмчлөл, эзэмшил, түрээсийн газарт тариалалт хийсэн байх;

• Газар нь e-gazar.gov.mn системд бүртгэлтэй байх;

• Тариалалт, арчилгаа, бордоо, пестицидийн хэрэглээ, ургац хураалт, бэлтгэсэн уриншийн мэдээг plant.mofa.gov.mn системд бүртгэсэн байх;

• Гарал үүслийн цахим гэрчилгээтэй байх;

• e-barimt.mn системд бүртгүүлж, урамшуулалд хамрагдах бүтээгдэхүүний кодоор цахим баримт үүсгэн, худалдан авалт, борлуулалтыг баталгаажуулсан байх.

Эдгээр шаардлагыг бүрэн хангасан тохиолдолд uramshuulal.gov.mn цахим хуудсаар дамжуулан хүсэлтээ илгээж, урамшууллаа авах боломжтой.

Эх сурвалж: Хүнс, хөдөө аж ахуй, хөнгөн үйлдвэрийн яам