Жижиг, дунд үйлдвэр, үйлчилгээ эрхлэгчдийг дэмжих зорилгоор Төв аймагт хэрэгжүүлж буй санхүүгийн дэмжлэгийн хүрээнд 25 төсөл шалгарч, нийт 3.7 тэрбум төгрөгийн хөнгөлөлттэй зээлд хамрагдахаар болжээ. Энэхүү зээлд хамрагдах төсөл сонгон шалгаруулалт гурван үе шаттай явагдсан бөгөөд нийт 111 төсөл, 16.7 тэрбум төгрөгийн санал ирүүлснээс шилдэг төслүүдийг тодруулан дэмжсэн байна.

Аймгийн хэмжээнд батлагдсан 8 тэрбум төгрөгийн санхүүжилт нь нийт 16 тэргүүлэх чиглэлд зориулагдсан бөгөөд шалгарсан аж ахуйн нэгжүүд “Зээлийн зарцуулалт ба тайлагнал”, “Гэрээний эрх, үүрэг, эргэн төлөлт” зэрэг сэдвээр тусгай сургалтад хамрагджээ.

Аймгийн Засаг дарга Л.Төмөрчөдөр энэ үеэр хэлэхдээ: “Үнэхээр хичээж байгаа, үйлдвэрлэлээ өргөжүүлэх чин хүсэлтэй иргэд л энэхүү зээлд хамрагдсан. Цаашид бид үлдсэн 4.3 тэрбум төгрөгийг хамгийн хэрэгтэй нэгэнд нь хүргэхээр дахин сонгон шалгаруулалт зохион байгуулна. Үйлдвэрлэгч та бүхэн эрүүл, аминдэмтэй, хэрэглэгчдэд ээлтэй бүтээгдэхүүн гаргахын төлөө ажиллаарай” хэмээн онцоллоо.

Шалгарсан төсөл дундаас “Төгс био” брэндийн үүсгэн байгуулагч дараах байдлаар сэтгэгдлээ илэрхийлсэн байна: “Манайх чацаргана, мойл, энгийн гэсэн гурван төрлийн хөлдөөж хатаасан тараг үйлдвэрлэдэг. Бүтээгдэхүүн маань тарагны хөрөнгө болох боломжтойгоороо давуу талтай. Харин техник, тоног төхөөрөмж дутмаг байдлаас болж гараар хийх ажил их байсан. Харин одоо энэ зээлд хамрагдсанаар хүчин чадлаа нэмэгдүүлж чадах нь гэж найдаж байна” гэлээ.

Мөн Дархан-Уул, Сэлэнгэ, Төв аймгаас нийт 319 аж ахуйн нэгж зээлийн цахим системд 48.8 тэрбум төгрөгийн хүсэлт илгээсэн нь жижиг, дунд үйлдвэрлэл эрхлэгчдийн идэвх өндөр байгааг харуулж байна.