Санхүүгийн зохицуулах хорооны (СЗХ) дарга Т.Жамбаажамц АНУ-ын OTC Markets Group болон Канадын Хөрөнгийн бирж (CSE)-ийн удирдлагуудтай уулзаж, хоёрдогч зах зээлийн арилжаа болон гадаадын хөрөнгө оруулагчдыг татах боломжийн талаар хэлэлцлээ.
Уулзалтын үеэр OTC Markets Group-ийн платформоор дамжуулан “cross-trading” буюу хоёрдогч зах зээлийн арилжаа хийх боломж, шаардлагуудыг танилцуулж, цаашид хоёр улсын брокерын компаниудын дэд бүтцийн холболтыг бий болгох чиглэлд хамтын ажиллагаагаа өргөжүүлэхээр тохиролцсон байна.
СЗХ нь өнгөрсөн оноос эхлэн OTC Markets Group-тэй хамтран ажиллаж, Монголын хөрөнгийн биржийг тус байгууллагын “Хүлээн зөвшөөрөгдсөн хөрөнгийн бирж” (Qualified Foreign Exchange) статустай болгох чиглэлээр арга хэмжээ авч хэрэгжүүлсний үр дүнд энэ статусыг олгуулах нөхцөл бүрджээ. Ингэснээр Монголын компаниуд АНУ-ын хөрөнгө оруулагчдаас хөрөнгө татах шинэ боломжтой болсон бөгөөд энэ нь гадаад зах зээлд гарч ажиллах хүсэлтэй компаниудад чухал дэмжлэг болохыг онцолсон байна.
Мөн уулзалтаар Канадын хөрөнгийн биржид Монголын компаниуд бүртгүүлж, хөрөнгө татах боломжийн талаар санал солилцож, хоёр тал хамтран өнгөрсөн жил амжилттай зохион байгуулсан вебинарыг үргэлжлүүлэхээр ярилцжээ.
Энэхүү уулзалт нь Монгол Улсын хөрөнгийн зах зээлийг олон улсын зах зээлтэй холбож, гадаадын хөрөнгө оруулагчдыг татах, дотоодын компаниудад хөрөнгө босгох боломжийг өргөжүүлэх чиглэлээрх чухал алхам боллоо.
Эх сурвалж: Санхүүгийн зохицуулах хороо
