Аж үйлдвэрийн салбарын нийт үйлдвэрлэл 2025 оны эхний хоёр сарын урьдчилсан гүйцэтгэлээр 5.1 их наяд төгрөгт хүрсэн нь 2024 оны мөн үеийнхээс 747.1 тэрбум төгрөгөөр нэмэгдсэн үзүүлэлттэй байна. Үндэсний статистикийн хорооны мэдээлснээр, уг өсөлтөд уул уурхай, олборлолтын салбар 492.9 тэрбум төгрөг, боловсруулах үйлдвэрлэл 129.5 тэрбум төгрөгөөр нэмэгдсэн нь голлон нөлөөлжээ.

Уул уурхай, олборлох салбарын нийт үйлдвэрлэл

• 3.5 их наяд төгрөгт хүрч, 492.9 тэрбум төгрөгөөр нэмэгдсэн.
• Металлын хүдэр олборлолт 280.4 тэрбум төгрөг,
• Хүрэн нүүрс олборлолт 204.1 тэрбум төгрөгөөр өсжээ.
• Төмрийн хүдэр, хүрэн нүүрс, цайрын баяжмал, зэсийн баяжмал зэрэг бүтээгдэхүүний биет хэмжээ 4.1-92.3 хувиар өссөн байна.
• Харин төмрийн хүдрийн баяжмал, цэвэршүүлээгүй алт, баяжуулсан нүүрс, чулуун нүүрс, газрын тос, мөнгөний баяжмал 0.1-13.6 хувиар буурсан байна.

Боловсруулах аж үйлдвэрийн салбар

• Ус, ундаа шүүс, ноолууран сүлжмэл эдлэл, самнасан ноолуур, нүүрсэн шахмал түлш, хэвийн боов, шингэн сүү, янжуур тамхи зэрэг бүтээгдэхүүний үйлдвэрлэл 2.8-87.3 хувиар өсжээ.

Борлуулалтын хэмжээ буурсан үзүүлэлттэй гарчээ

• Аж үйлдвэрийн салбарын борлуулсан бүтээгдэхүүн 7.1 их наяд төгрөгт хүрсэн нь 2024 оны мөн үеийнхээс 971.8 тэрбум төгрөгөөр буурсан байна.
• Үүнд уул уурхай, олборлох салбарын борлуулалт 1.3 их наяд төгрөгөөр буурсан нь голлон нөлөөлжээ.
• Нүүрс олборлолтын салбарын борлуулалт 1.7 их наяд төгрөг,
• Газрын тос олборлолт 26.8 тэрбум төгрөгөөр буурсан байна.

Гадаад зах зээл дэх борлуулалт

• 2025 оны эхний хоёр сарын урьдчилсан гүйцэтгэлээр 4.8 их наяд төгрөгийн борлуулалт хийгдсэн нь нийт борлуулалтын дийлэнх хувийг эзэлж байна.
• Үүний 4.7 их наяд төгрөг нь уул уурхай, олборлох салбарт хамаарч байна.
• Уул уурхайн гадаад борлуулалтын бүтцэд:
  • 42.4% - нүүрс,
  • 52.7% - металлын хүдэр,
  • 3.4% - газрын тос,
  • 1.5% - бусад ашигт малтмалын олборлолт тус тус эзэлжээ.