Монголбанкны Мөнгөний бодлогын хороо 2025 оны 1 дүгээр сарын 15-ны өдрийн хуралдаанаараа дараах шийдвэр гаргалаа:
- Бодлогын хүүг 10 хувьд хэвээр хадгалах.
- Төгрөг болон гадаад валютын заавал байлгах нөөцийн хэмжээг 2 нэгж хувиар нэмэгдүүлэх.
Энэхүү шийдвэр нь инфляцыг тогтворжуулах, эдийн засаг, санхүүгийн салбарын тогтвортой байдлыг хангахад чиглэгдэж байна.
2024 оны 12 дугаар сард улсын хэмжээнд инфляц 9 хувь, Улаанбаатар хотод 9.1 хувьд хүрсэн байна. Үнийн өсөлтөд цахилгаан эрчим хүчний үнэ, мах, импортын барааны үнэ голлон нөлөөлжээ.
Монголбанкнаас гаргасан тооцооллоор, эдгээр хүчин зүйлүүд инфляцын түвшинд дарамт учруулж, макро эдийн засгийн тогтвортой байдлыг алдагдуулах эрсдэлийг нэмэгдүүлж байгаа тул ийнхүү мөнгөний бодлогын арга хэмжээ авах шаардлагатай гэж үзжээ.
Цаашид инфляцын түвшинг хяналтад байлгах, дотоодын зах зээлийн тогтвортой байдлыг хангах чиглэлээр нэмэлт бодлогын арга хэмжээнүүдийг хэрэгжүүлэхээр төлөвлөж байна.
Эх сурвалж: МОНЦАМЭ
