Сэлэнгэ аймгийн Сүхбаатар суманд баригдах 70 МВт-ын хүчин чадал бүхий дулааны цахилгаан станцын төсөлд зориулсан тоног төхөөрөмжид ногдуулах нэмэгдсэн өртгийн албан татварыг дөрвөн жилийн хугацаанд хэсэгчлэн төлүүлэхийг Засгийн газраас зөвшөөрсөн байна.
“Райд Монголиа” ХХК-ийн импортоор оруулж ирэх энэхүү тоног төхөөрөмжийн зөвшөөрлийг Монгол Улсын Засгийн газрын 2023 оны 337 дугаар тогтоолоор батлагдсан “Татвар төлөх хугацааг сунгах, хэсэгчлэн төлүүлэх, татвараас чөлөөлөх журам”-ын дагуу үйлджээ.
Барилга угсралтын ажил нь эхлээд буй Сэлэнгэ аймгийн төв Сүхбаатар сумын нутаг дахь 70 МВт-ын дулааны цахилгаан станц нь Түшиг сумын нутагт орших Хужиртын нүүрсний уурхайгаас нүүрсний хэрэглээгээ хангах юм.
Тус станц нь жилд 285.9 сая КВт цахилгаан эрчим хүч, 373.0 мян.Гкал дулааны эрчим хүч үйлдвэрлэн түгээх хүчин чадалтай байхаар техник, эдийн засгийн үндэслэлд нь тусгажээ.
Нийт 141.1 сая ам.долларын хөрөнгө оруулалт бүхий дулааны цахилгаан станцын эхний үе шат болох 25.0 МВт-ыг ирэх 2025 оны 10-р сард, хоёрдугаар блокийг 2026 оны 3-р сард тус тус ашиглалтад оруулахаар төлөвлөн ажиллаж байна.
