Өчигдөр буюу баасан гаригийн өглөөнөөс Өмнөд Солонгосын нутаг дэвсгэрийн ихэнх хэсгийг шар шороон шуурга нөмөрч, агаарын чанар эрс муудсаныг Yonhap News мэдээлжээ. Тус улсад мөрддөг стандартаар шоо метр тутамд 151 микрограммаас дээш нарийн ширхэгтэй тоосонцор хэмжигдэхийг “агаарын чанар маш муу” гэж үздэг байна.
Тэгвэл баасан гаригийн өглөөний 8:00 цагийн байдлаар нийслэл Сөүл хотод энэ хэмжээ 440 мкг/м3 байв. Үүнээс хоёр цагийн өмнө буюу өглөөний 6:00 цагт Инчон хотын Чонна-дон дүүрэгт 698 мкг/м3 хүрсэн нь хамгийн өндөр бохирдол болсон байна. Шар шороон шуургыг Монголын тэгш өндөрлөгөөс гаралтай гэж Өмнөд Солонгосын Цаг Уурын Алба (КМА) мэдээлжээ.
"Монголын тэгш өндөрлөг" гэдэг нь газар зүйн хувьд Байгал нуураас Ордос, Тэнгэр уулаас Хянганы нуруу хүртэлх хээр тал, өндөр уул хосолсон нутгийг хэлдэг. Байгалийн энэ гамшигт үзэгдэл бямба гариг хүртэл үргэлжлэхийг Өмнөд Солонгосын эрх баригчид иргэддээ анхааруулжээ.
