Монгол Улсын Засгийн газар өнөөдөр бүрэн бүрэлдэхүүнээрээ хувийн хэвшлийн аж ахуйн нэгжүүдийн төлөөлөлтэй зөвлөлдөх уулзалт хийлээ.

Ерөнхий сайд Л.Оюун-Эрдэнэ, Хувийн хэвшил хөгжснөөс хойш 30 жилийн хугацаагаан дахь бизнесийн амжилтыг бид хамтдаа хэлэлцэж, тодорхой үр дүн гаргах цаг боллоо гэдгийг онцолж байв.

МҮХАҮТ-ын Ерөнхийлөгч Д.Энхтүвшин, Ерөнхий сайд бүрэн бүрэлдэхүүнээрээ бизнес эрхлэгчидтэй уулзаж байгаад талархал илэрхийлээд, Монголын бизнесийн орчны судалгааны үр дүнгийн талаар танилцуулав. Тэрээр, Танхимаас Бизнес эрхлэх орчныг сайжруулахад татварын таатай орчин буюу хүртээмжтэй байдал, мөн хүний нөөцийн хомсдол нэн түрүүнд шийдэх асуудал гэдгийг судалгаагаар харуулсныг хэллээ.

Мөн Судлаач Д.Бум-Эрдэнэ, “Монголын бизнесийн тренд-2024, Үндэсний ТОП-50 CEO”судалгааны дүнг танилцуулан,ирэх онд бизнесийн орчин сайжрах төлөвтэйг дурдав.

Уулзалтад оролцогчид бизнесийн орчин, татвар, тээвэр, аялал жуулчлал , нийслэлийн тулгамдаад буй асуудлын талаар санал сонсох, хэрхэн хамтран ажиллаж үр дүнд хүрэх талаар санал солилцлоо.

Ерөнхий сайд Л.Оюун-Эрдэнэ уулзалтын төгсгөлд “Төр, хувийн хэвшилд аль алинд нь шүүмжлэлтэй зүйлс бий. Алдаа, оноогоо дүгнээд урагшлах ёстой. Ирэх 30 жилийн хөгжил, шийдэл ярья. Монголын компаниуд ирэх 30 жилд олон улсын зах зээлд бизнесээ тэлж, гадагшаа чиглэсэн хөрөнгө оруулалт хийх, үндэсний томоохон мега төслүүдийг хамтран хэрэгжүүлэх цаг нь болжээ. Хууль эрх зүйн орчныг сайжруулахдаа хувийн хэвшлийн аж ахуйн нэгжүүдийн өнцгөөс өөрчилье. МҮХАҮТ хувийн хэвшилтэйгээ ярилцаад, хууль эрх зүйн орчноо тодорхойл. Энэ бол шинэ хандлага.

Ажлын арга барилдаа хийж буй өөрчлөлт. Бид шаардлагатай улс төрийн дэмжлэг үзүүлнэ. Эрх зүйн цогц шинэчлэл хийхийн тулд төлөвлөгөө гаргаад явъя. МҮХАҮТ гэдэг институцээ олон улсын хэмжээнд хүргэе. Цаашид аливаа хуулийн төслийг МҮХАҮТ-аар дамжуулан хувийн хэвшлийн дуу хоолойг тусгаж, хэлэлцүүлдэг жишиг тогтоох нь чухал” гэлээ.