Монголын Үндэсний Худалдаа, Аж Үйлдвэрийн Танхимын ээлжит XXI Их хурал Шангри Ла Улаанбаатар зочид буудалд өчигдөр болж өндөрлөлөө. Дөрвөн жилд нэг удаа болдог тус их хурлаар МҮХАҮТ-ын Удирдах зөвлөлийн гишүүд болон ерөнхийлөгчийг сонгожээ.
МҮХАҮТ-ын ерөнхийлөгчид Л.Төр-Од, Т.Ганболд, Б.Гантулга, О.Одбаяр, Д.Бямбасайхан, Т.Дүүрэн, Ш.Мөнхсайхан, Д.Болор, Д.Энхтүвшин, Б.Жаргалсайхан, Ш.Төмөрсүх, Ш.Отгон-Өлзий, Б.Лакшми нарын 13 хүн танхимын ерөнхийлөгчид нэрээ дэвшүүлж өрсөлдсөнөөс олонхийн саналаар "шарк" Д.Энхтүвшин сонгогдож, ирэх дөрвөн жил танхимыг удирдахаар болов. Д.Энхтүвшин нь "MCS" группийн дэд ерөнхийлөгчөөр ажиллаж байжээ.
МҮХАҮТ 5,900 гаруй гишүүн байгууллагатай, 21 аймагт салбар танхимтай, 23 улсад 51 төлөөлөгчтэй, бизнес эрхлэгчдийн нийтлэг эрх ашгийг төлөөлөн хамгаалах үүрэг бүхий төлөөллийн байгууллага юм.
