ОУОХ-ны Гүйцэтгэх зөвлөлийн хурал болж, сонирхогчдын боксын талаар авч хэлэлцжээ. ОУОХ-ны хэвлэл мэдээлэл хариуцсан захирал Марк Адамс хэлэхдээ "Хэрвээ холбооныхоо дотоод засаглалын асуудлыг зөв шийдэж чадахгүй бол боксын спортыг Олимпийн наадмаас хасах боломжтой" гэж анхааруулсан байна.
"Ирэх сард болох AIBA (Олон Улсын Боксын Холбоо) дотоод засаглалын асуудлаа шийдэхгүй бол Олимпийн хөтөлбөрт боксын спорт багтах эсэх, цаашлаад AIBA-г хүлээн зөвшөөрөх эсэх асуудлуудыг хөндөх болно” гэж гүйцэтгэх зөвлөл мэдэгдсэн байна.
Москвад хотод болох Сонирхогчдын боксын олон улсын холбооны тэргүүний сонгуульд одоогийн байдлаар ганцхан Гафур Рахимов нэр дэвшсэн байгаа юм. Яагаад түүнийг нэр дэвшүүлж болохгүй гэхээр Узбекистаны бизнесмэн Рахимов, гэмт хэргийн бүлэглэлүүдтэй холбоотой шалтгаанаар АНУ-ын сангийн яамны хар жагсаалтад орсон мөн зохион байгуулалттай гэмт хэрэг, эдийн засгийн гэмт хэрэгт холбоотой гэж үзсэн хэрэг. Тийм учраас ОУОХ AIBA-д хандан, Рахимовоос өөр хүн сонгохыг шаардаж байгаа аж. Хэрэв шаардлагыг биелүүлэхгүй бол ОУОХ-ноос сонирхогчдын боксын холбоонд шийтгэл оноож дээрх арга хэмжээг авах гэнэ.
AIBA-д шахалт үзүүлж, дотроос нь шинэчлэхийн тулд ОУОХ энэ онд тус холбоонд үзүүлэх санхүүгийн дэмжлэгээ зогсоогоод байна.
ОУОХ AIBA-д дарамт үзүүлж байгаа ч боксын спортын тамирчдын эрх ашгийг хөндөхгүй байх, Олимпийн хүсэл мөрөөдлийг нь хамгаалахад анхаарч ажиллахаа амлажээ.
