Улсын буюу төрийн өмчит сургууль, цэцэрлэгүүдэд жил бүр олгодог хувьсах зардлыг хувийн цэцэрлэг, сургуульд мөн ялгаагүй олгодог билээ. Үүнээс болж хувийн болон улсын сургууль, цэцэрлэгүүдийн дунд санхүүжилтийн тэнцвэргүй байдал үүсч, улсын сургууль, цэцэрлэгүүд санхүүжилтын хувьд байнга дутагдалтай явж ирсэн байдаг. 

Тэгвэл Боловсрол, шинжлэх ухааны сайд Л.Энх-Амгалан "Өндөр төлбөртэй хувийн сургуульд төсвөөс олгодог хувьсах зардлыг ирэх сараас зогсооно" хэмээн твиттер хуудсаар мэдэгдсэн билээ.

Тэр дундаа 10 ба түүнээс дээш сая төгрөгийн төлбөртэй сургуульд хувьсах зардлыг өгөхгүй байхаар шийдвэрлэжээ.

Тодруулбал, хувийн үйл ажиллагаатай 5 сая хүртэлх төлбөртэй 106 сургууль, 5-10 сая төгрөийн төлбөртэй 12 сургууль, 10-аас дээш сая төгрөгийн төлбөртэй 8 хувийн сургууль байдаг байна.

Энэ талаар Боловсрол, шинжлэх ухааны сайд Л.Энх-Амгалан “Хувийн сургуулиуд адилхан танхимаар хичээллэхгүй байгаа. Зардал хэмнэж байгаа. Дээр нь төрөөс цахилгаан дулааныг нь хөнгөлж байна. Ажилчдынх нь НДШ-ийг төр хөнгөлж байна. Дээр нь 1 хүүхдээс 10 сая төгрөг авч байна. Гэтэл Төрийн сургуульд явдаг 170.000 хүүхэд хичээлийн хоцрогдолд орсон. Нийслэл хотод 30.000 гаран хүүхэд тог цахилгаангүй, зурагтгүй, кабельгүй, утасгүй, компьютергүй орчинд байна. Хувийн сургуулиудаас хэмнэсэн хувьсах зардлыг амьдралын боломжгүй, цахимаар болон теле хичээл авах боломжгүй хүүхдүүдэд зориулна. Зохион байгуулалттай, төсөвтэй, захиалагчтай нэр нүүргүй троллуудаас айхгүй шүү” хэмээн бичжээ.