Тулгар төрийн 2227, Их Монгол Улсын 812, Ардын хувьсгалын 97 жилийн ойн баяр наадам болоход сар хүрэхгүй хугацаа үлдээд байна. Үүнтэй холбогдуулж Шадар сайд, Үндэсний их баяр наадмыг зохион байгуулах хорооны дарга Ө.Энхтүвшин өнгөрсөн бямба гаригийн амралтын энэ өдөр наадмын бэлтгэл, засварын ажилтай танилцаж, Төв цэнгэлдэх хүрээлэн, сур, шагайн асар, Хүй долоон худагт ажилласан. Мөн энэ үеэрээ уяач, бөхчүүдийн төлөөлөлтэй уулзаж, энэ жилийн баяр наадмыг хэрхэн зохион байгуулах болон ард түмнээ сайхан наадамлуулах, наадмаа ямар нэгэн будилаан, маргаангүй шударга зохион байгуулах талаар анхааруулсан юм.

Ялангуяа Бөхийн холбоонд үүсээд байгаа маргаан баяр наадамд нөлөөлөх учиргүй гэдгийг үндэсний бөхийн долоон аваргыг хүлээж авч уулзах үеэрээ хэлсэн байдаг. Тэгвэл Үндэсний их баяр наадмын салшгүй нэг хэсэг болох хурдан морины уралдааны үеэр автомашин дагаж давхиулахгүй байх асуудлыг Монголын морин спорт уяачдын холбооноос хөндөж эхэлжээ.

Энэ тухай Монголын морин спорт уяачдын холбооны ерөнхийлөгчийн үүрэг гүйцэтгэгч М.Мөнхбаясгалан “Манай холбооны зүгээс машингүй наадмыг зохион байгуулах байр суурьтай байгаа. Уралдааныг зөвхөн хүн эмнэлэг, мал эмнэлэг, тугны машин, телевизийн машин дагах юм. Гэхдээ цаашдаа телевизийн машиныг явуулахгүйгээр технологийн давуу талыг ашиглах бодлого барьж ажиллана. Унаач хүүхдүүдийн аюулгүй байдлыг хангах үүднээс зам засах, усалгаа хийхээс гадна унаач хүүхдэд стандарт хувцас өмсүүлж хэвших чиглэлд Гэр бүл хүүхэд залуучуудын хөгжлийн газартай хамтран ажиллаж байна” гэлээ.

Харин “Монгол наадам цогцолбор”-ын дарга Н.Батсүмбэрэл, “Морин тойруулгын ажлыг энэ онд багтаан эхлэх цаашлаад хурдан морины замын дагуу засмал зам тавина. Замын ажлыг төр, хувийн хэвшлийн түншлэлийн хүрээнд хийх боломжтой. Үндэсний их баяр наадмын үеэр хурдан морьдын уралдааныг засмал замаар дагахаас гадна холын зайн гүйлтийн тэмцээн зэрэг олон төрлөөр ашиглах юм” гэсэн юм.