Нийслэл дэх гарааны бизнесүүдийг бойжуулах, шинэ санаа, инновацид суурилсан гарааны бизнесүүдийг хөгжүүлэх, залуучуудыг ажлын таатай орчноор дэмжих, инновацийн оролцогч талуудын хамтын ажиллагааг бүрдүүлж инновацийн тогтолцоог бий болгох зорилго бүхий “Улаанбаатар инновацийн төв” үүдээ нээлээ.

Инновацийн төв байгуулагдаж байгаа нь шинэ залуу энтрепренэрүүд, гарааны бизнес эрхлэгчдийг дэмжих үр дүнтэй арга юм. Залуучуудыг шинэ санаа, инновациа бодитоор хэрэгжүүлэх, ажил хэрэг болоход тушаа болдог оффисын асуудлыг шийдэж байгаагаас гадна тухайн салбартаа амжилттай ажиллаж буй бизнес эрхлэгчдээс тусламж, зөвлөгөө авах боломж олгож байгаагаараа энэ төв онцлог юм. 

1,500 м.кв тохижилт хийсэн тус төвийн нэг давхарт нь гарааны бизнесүүдийг бойжуулж, үйл ажиллагааг нь хурдасгах зорилготой оффисууд, амралтын хэсэг, хурал, сургалтын өрөөтэй бөгөөд хоёрдугаар давхрыг оффис шаардлагатай хувь хүн, оюутнууд болон бизнес эрхлэгчдэд зориулжээ. 

“Улаанбаатар инновацийн төв” Сүхбаатар дүүрэг, Нийслэлийн иргэний танхимын байранд 4-12 хүний багтаамжтай 13 оффисын өрөөнд нийслэлд чухал шаардлагатай асуудлуудыг шийдэх зорилготой гарааны бизнесүүдийг шалгаруулан оруулах юм байна. 

Мэдлэгт тулгуурласан, инновацийн технологи бүхий үйлдвэрлэл үйлчилгээ нь тогтвортой хөгжлийн гол хүчин зүйл болж буй өнөө үед Монгол Улсад анх удаа инновацийн төв байгуулагдаж байгаа нь шинэ залуу энтрепренэрүүд, гарааны бизнес эрхлэгчдийг дэмжих хамгийн үр дүнтэй арга болж байгаа юм. Залуучуудыг шинэ санаа, инновациа бодитоор хэрэгжүүлэх, ажил хэрэг болоход тушаа болдог офиссын асуудлыг шийдэж байгаагаас гадна энэ төвөөр дамжуулан тухайн салбартаа амжилттай ажиллаж буй бизнес эрхлэгчдээс тусламж, зөвөлгөө авах боломжийг олгож байгаа юм.

Нийслэлийн Үйлдвэрлэл, инновацийн газрын дарга Б.Бат-Эрдэнэ: 

-Энэ төвөөр дамжуулан гарааны компаниудыг бойжуулаад, бүтээгдэхүүнийг дотоодын болоод гадаад зах зээл гаргах зорилготой ажиллана. Манай залуучууд мэдээллийн технологийн чиглэлээр гадны зах зээл дээр гарч, хүрээгээ тэлж байна. Энэ чиглэл дээр бид инновацийн төвдөө анхны загвар турших орчин үеийн тоног төхөөрөмжөөр тоноглосон лаборатори бий болгосон. Мөн энэ төвөөр дамжуулан Монголдоо анх удаа технологийн биржийг нэвтрүүлэхээр шинжлэх ухааны технологийн биржтэй тохирчихоод байгаа” хэмээлээ.

Ард санхүүгийн нэгдлийн гүйцэтгэх захирал Ч.Ганхуяг:

-Бид бодит байдал дээр төр хувийн хэвшлийн түншлэл гэдэг зүйлийг эндээс харж болж байна. Хотын зүгээс залуучуудаа дэмжиж байгаа сайн үлгэр дууриалал болж байна. Бид эдийн засгаа төрөлжүүлж, солонгруулъя гэж ярьдаг. Харин бодитоор төр засгаас ямар нэг ажил хийж байсангүй. Залуучуудаа дэмжиж бодит ажил болгож чадсан хотын дарга С.Батболд болон таны ажлын хамт олонд талархснаа илэрхийлж амжилт хүсье” гэлээ.