Энхийн гүйлт нь жил бүр АНУ-ын Нью-Йорк хотоос гараагаа аван, дэлхийн таван тивийн 150 гаруй улс орныг хамарч, үндэс угсаа, нас хүйс, шашин шүтлэг өөр өөр сая сая хүмүүс түүнд нэгдэн оролцдог.
Монгол Улс анх 1995 онд энхийн галт бамбарыг хүлээн авсан бөгөөд түүнээс хойш хоёр жил тутамд тус гүйлтийг амжилттай зохион байгуулж, улмаар Ази-Номхон далайн бүсийн орнуудын маршрутад нэгдэн оролцож байна.
Энхийн гүйлтийн 2018 оны үндсэн маршрут нь БНХАУ-ын ӨМӨЗО-ны Хөлөнбуйр аймгийн Амгаланбаатар хотоос буухиалсан бамбарыг Дорнод аймгийн хилийн боомтоор тавдугаар сарын 31-нд хүлээн авснаар эхэллээ. Улмаар Монгол орны 13 аймгийн 39 сум суурин газраар нийт 3,000 орчим км замыг туулан, Баян-Өлгий аймгийн Цагаан нуурын боомтоор зургаадугаар сарын 22-нд ОХУ-ын талд шилжинэ.
Улаанбаатар хотын хэмжээнд Энхийн галт бамбарыг угтах ажиллагаа өчигдөр Багануур дүүрэгт эхэлсэн юм. Улмаар Налайх, Баянзүрх дүүрэгт буухиачлан зургаадугаар сарын 8-нд Хан-Уул дүүрэг нь Төв аймагт шилжүүлснээр өндөрлөх ажээ.
Галт бамбарыг Улаанбаатар хотод аялуулах маршрут:
- 1-р цэг Баянзүрхийн товчоо - Баянзүрх дүүрэг хүлээн авна - VI/06-ны 15:00;
- 2-р цэг Үндэсний цэцэрлэгт хүрээлэн - Ёслолын арга хэмжээ - VI/06-ны 16:00,
- Гараа - VI/08-ны 08:30;
- 3-р цэг Бөхийн өргөө - Сүхбаатар дүүрэг хүлээн авна - VI/08-ны 09:00;
- 4-р цэг УИД-ийн өмнөх талбай - Чингэлтэй дүүрэг хүлээн авна - VI/08-ны 09:30;
- 5-р цэг Төмөр замын СО-ны талбай - Баянгол дүүрэг хүлээн авна - VI/08-ны 09:40;
- 6-р цэг Сапоро - Хан-Уул дүүрэг хүлээн авна - VI/08-ны 10:00;
- 7-р цэг Таваншар - Сонгинохайрхан дүүрэг хүлээн авна - VI/08-ны 10:15;
- 8-р цэг 22-н Товчоо - Сонгинохайрхан дүүрэг үднэ - VI/08-ны 10:45.
Эх сурвалж: Нийслэлийн биеийн тамир, спортын хороо
