Монгол Улсын Засгийн газар, Уругвай Улсын Засгийн газар хооронд байгуулсан Дипломат, албан болон энгийн паспорт эзэмшигчдийг визийн шаардлагаас чөлөөлөх тухай хэлэлцээр 2018 оны 6 дугаар сарын 10-ны өдрөөс эхлэн хүчин төгөлдөр болох бөгөөд хэлэлцээрийн дагуу хоёр талын иргэд 30 хүртэл хоног харилцан визгүй зорчих боломжтой.
Дээрх хэлэлцээр хэрэгжиж эхэлснээр Монгол Улсын энгийн паспорттай иргэд нийт 22 улсад визгүй зорчдог болох юм.
ГАДААД ХАРИЛЦААНЫ ЯАМ
Уругвай улсын тухай товч:
Өмнөд Америкийн Уругвай улс нь Бразил, Аргентины хооронд дунд орших жижигхэн орон. Үүгээрээ манай Монголтой төстэй. Гэхдээ Уругвай нь ашигт малтмал зэрэг байгалийн баялгаар хомс, мөн халуун орны ховор модод ч энд бараг ургадаггүй. Гэтэл энэ улсын нэг хүнд ногдох орлого 13 мянган доллар байгаа нь бүс нутагтаа дээгүүрт орно.
Уругвай улс нь Латин Америкийн хамгийн хөгжилтэй орнуудын нэг бөгөөд гэмт хэргийн гаралт бүс нутагтаа маш бага. Энэ улс эдийн засгаа экспортод чиглүүлсэн, хөдөө аж ахуй, ялангуяа мал аж ахуйгаас төсвийн гол орлого орж ирдэг. Уругвайчууд бод малыг махны, хонийг ноосны чиглэлээр үржүүлдэг бөгөөд газар нутгийнхаа аравны есийг хөдөө аж ахуйн зориулалтаар ашигладаг. Малын бэлчээр л гэхэд 14 сая гектар эзэлдэг аж. Хачирхалтай нь энэ улсын хөдөлмөр эрхэлж буй иргэдийн ердөө есөн хувь нь хөдөө аж ахуйд, 76 хувь нь үйлчилгээний салбарт, 15 хувь нь үйлдвэрлэлд ажилладаг. 3,5 сая хүнтэй энэ орны хүн амын 92 хувь нь хотод амьдардаг. Учир нь үйлдвэр, байгууллагын 75 хувь нь нийслэл хот Монтевидеод төвлөрчээ. Эрчүүдийн дундаж наслалт 73, эмэгтэйчүүд 80 байдаг байна.
Уругвай нь цагаан арьстнууд зонхилсон Латин Америкийн цөөхөн улсын нэг. Учир нь XVI зууны үед Испани, Португаль өнөөгийн Уругвай улсын газар нутгийг эзэлж, уугуул оршин суугчид болох чарруа омгийн индианчуудыг устгажээ. Уругвай газар нутгийн хэмжээгээр дэлхийд 88-д ордог. Албан ёсны хэл испани.
Хоёр том улсын хооронд хоршдог энэ орон 1828 онд тусгаар тогтнолоо зарласан.
Уругвайн 40 дэх Ерөнхийлөгч Мухика ямар ч хамгаалалтгүй явдаг. Тэрбээр Ерөнхийлөгчийн өргөөнд бус хотын захын жижиг фермд эхнэртэйгээ амьдардаг. Эхнэр нь тус улсын парламентын дээд танхимийн гишүүн аж. Тэд 2005 онд гэрлэжээ. Мухика 1987 оны «wolkswagen beetle» машинаас өөр өмчгүй, данс ч байхгүй. Тэр хуучин машинаа өөрөө унаж, ажилдаа явдаг. Мухика сарын 11680 долларын цалинтай ч ихэнхийг өөрийн нам, орон сууцны улсын хөтөлбөрт хандивладаг. Иймээс түүнийг дэлхийн хамгийн даруу Ерөнхийлөгч гэдэг.
