/Kazinform/ Бээжин хотноо энэ сарын 22-26-ны өдрүүдэд Хүн дүрст роботуудын дэлхийн II наадам болно гэж Синхуа агентлаг мэдээллээ.

Тэшүүрийн “Мөсөн тууз” цэнгэлдэх хүрээлэнд болох уг наадамд оролцох роботууд 51 төрлөөр 1301 уралдаанд оролцох юм. Энэ оны наадамд 16 улсын 666 багийн 2056 робот оролцох төлөвтэй байгаа нь өнгөрсөн оны тэмцээнтэй харьцуулахад оролцогч багуудын тоо 138 хувиар, роботуудын тоо 4 дахин нэмэгджээ.

Зохион байгуулагчдын ярьснаар, уралдаан тэмцээнийг бодит нөхцөл байдалд ойртуулсан хэлбэрээр явуулах бөгөөд үйлдвэрлэл, ложистик, зочид буудлын бизнес, барилгын салбарыг хамарна. Мөн аврах ажиллагаа явагддаг хүнд хэцүү орчинд уян манипуляторыг шалган туршиж, нунтаг зүйл жинлэх, пинцет буюу хавчаараар жижиг зүйлсийг чимхэж авах, лонхыг онгойлгох зэрэг нарийн ажиллагааг роботууд хэрхэн гүйцэтгэж буйг шалгана.  

Түүнчлэн уртын харайлт, хүндийг өргөлт, олсонд авирах, ширээний теннис зэрэг спортын төрлүүдийг хөтөлбөрт оруулсан нь роботуудын бүтэц, эд ангиудыг шалгах хүндхэн сорилууд байх болно хэмээн зохион байгуулах хорооны дэд дарга Зян Гуанжи ярилаа.

Энэ удаагийн наадам нь бодит үйлдвэрлэлд технологийг нэвтрүүлэх, роботууд уралдааны талбараас шууд үйлдвэрийн газруудад шилжин очих боломжийг нээх бөгөөд наадмын явцад боловсруулсан сорилуудын дүрэм журам нь тус салбарын техникийн стандартын үндэс суурийг бий болгоно хэмээн зохион байгуулагчид үзэж байна.