Японы мэргэжлийн сумо бөхийн аки башё өндөрлөлөө. Уг башёгийн таван зиндаанд Монголын 20 бөх барилдсанаас 14 нь качигоши буюу тавин хувийн амжилтаа үзүүлж, чансаа ахихаар болов. Ёкозүна цолны болзол сонссон озэки Киришима Б.Лхагвасүрэн сүүлийн өдөр давснаар тавин хувийн амжилтаа үзүүлсэн бол мэргэжлийн сумогийн замналаа жонокүчигийн барууны 17 дахь эрэмбээс эхлүүлсэн Жёошёоюү А.Сосорхүү анх удаа түрүүллээ.

Тэгвэл жюүрёод “төмөр хүн” хочит Тамаваши Б.Мөнх-Оргил 10 даваатай аки башёг дуусганаар ирэх арваннэгдүгээр сард макүүчид эргэн дэвших болзлоо хангав. Түүнтэй хамт жюүрёо зиндааны баруун болон зүүн жигүүрийн тэргүүлсэн Дэванорюү Т.Тэмүүлэн, Кёкүкайюү Ш.Далайбаатар нар дээд зиндаанд дэвшин барилдана. Үүнээс гадна дархан аварга Г.Өсөхбаярын хүү Тошинофүжи Ө.Дэмиджамц макүүчид дэвшсэн эхний башёдоо тавин хувийн амжилтаа үзүүллээ. Монгол сумочдын амжилтыг танилцуулж байна.

Макүүчи зиндаа

Озэки Киришима Б.Лхагвасүрэн 8:7

М-5 Оошома П.Дэлгэрбаяр 6:9

М-12 Асахакүрюү Р.Жамъянтогтох 8:7

М-14 Чиёошома Г.Мөнхсайхан 5:10

М-16 Тошинофүжи Ө.Дэмиджамц 9:6

Жюүрёо зиндаа

З-1 Дэванорюү Т.Тэмүүлэн 10:5

Б-1 Кёкүкайюү Ш.Далайбаатар 8:7

З-3 Тамаваши Б.Мөнх-Оргил 10:5

Б-3 Онокацү Б.Чойжилсүрэн 8:7

З-12 Тамашохо Э.Энхманлай 6:9

Макүшита зиндаа

Б-1 Асахифүжи Б.Очирсайхан 6:1

З-8 Тэншёояма Г.Отгонбат 6:1

З-10 Хокүтэнкай Г.Сүхбат 3:4

З-32 Тацүбаяма М.Буянтогтох  4:3

З-46 Тэнросэй С.Лувсангомбо 4:3

З-59 Саданохикари Д.Наранцогт 2:5

Санданмэ зиндаа

З-3 Хакүгэцүро А.Сүхбат 5:2

Жонокүчи зиндаа

Б-17 Жёошёоюү А.Сосорхүү 7:0

Б-18 Хокүто М.Хүсэлбаатар 6:1

Ташрамд дурдахад, мэргэжлийн сумогийн 76 дахь аварга Оносато энэ башёд 12 даваатайгаар түрүүлсэн бөгөөд замналдаа 6 дахиа эзэн хааны цом өргөлөө. Түүнд Япон Улсад айлчлал хийж буй Ерөнхий сайд Н.Учрал дөрвөн хүчтэнийг бэлгэдсэн Ерөнхий сайдын нэрэмжит цом гардуулжээ. Монгол Улсын Ерөнхий сайдын нэрэмжит шилжин явах цомыг 2010 оноос хойш жил бүрийн тодорхой башёд түрүүлсэн бөхөд гардуулж ирсэн уламжлалтай.