/Kazinform/ Европын Холбооны /ЕХ/ гишүүн 18 орны дотоод хэрэг, цагаачлалын асуудал хариуцсан сайд нар тус холбооны гадаад хилийн орчимд цагаачдын урсгал гэнэт ихээр нэмэгдсэн үед шуурхай хариу арга хэмжээ авах шинэ механизмыг боловсруулахаар тохиролцсон тухай “BILD” сонинд мэдээлснийг "Kazinform" агентлаг уламжилсан байна.

Уулзалт Германы Мюнхен хотод болсон бөгөөд Испанийн өөртөө засах эрх бүхий Сеута хот руу хэдэн арван мянган цагаачид дайран нэвтэрсэнтэй холбоотой нөхцөл байдал уулзалтыг зохион байгуулах шалтгаан болжээ. Испанийн төлөөлөгчид уулзалтад оролцсонгүй.

“BILD” сонинд мэдээлснээр, уулзалтад оролцогчид гурван зүйлээс бүрдсэн төлөвлөгөөг хэлэлцэн зөвшилцжээ. Нэгдүгээрт, ЕХ-ны гадаад хил дээр үүссэн цагаачлалын хямралыг онцгой нөхцөл байдал гэж албан ёсоор хүлээн зөвшөөрөх нийтлэг шалгуурыг тогтооно. Хоёрдугаар заалт нь хямралын нөхцөл байдал тогтоогдсон тохиолдолд хууль бусаар нэвтэрсэн цагаачдыг буцаах ажиллагааг түргэвчилсэн журмаар хэрэгжүүлэх ажээ. “Эдгээр цагаачдын урсгал нь хүмүүнлэгийн онцгой нөхцөл байдлаас бус, харин ташаа мэдээллээс үүдэлтэй” гэж Германы Дотоод хэргийн сайд Александр Добриндт Сеутад болсон үйл явдлын талаар ярихдаа мэдэгдсэн байна.

Гуравдугаарт, Европын хил, эргийн хамгаалалтын агентлаг болох "Frontex"-ийн оролцоог нэмэгдүүлэхээр төлөвлөжээ. Тодруулбал, ЕХ-ны гадаад хил дээр цагаачдын урсгал огцом нэмэгдсэнээс үүдэн хүнд нөхцөл байдалтай тулгарсан улс орнуудад дэмжлэг үзүүлэх зорилгоор тус агентлагийн шуурхай ажиллагааны нэгжийг 24 цагийн дотор илгээхэд бэлэн байлгах механизмыг бий болгохоор санал болгосон байна. "Frontex"-ээс тусламж авах хүсэлтийг ЕХ-ны гишүүн орнууд өөрсдөө гаргах аж.

Мөн цагаачдыг буцаах асуудалд "Frontex"-ийн бүрэн эрхийг өргөжүүлж, тэднийг буцаах ажиллагаанд, тэр дундаа дамжин өнгөрөх орнуудаас буцаах үйл явцад тус агентлагийг илүү идэвхтэй оролцуулахыг А.Добриндт дэмжжээ.