Тэрбумтан Илон Маскийн эзэмшдэг Америкийн "SpaceX" корпорац хөрөнгийн биржид шинээр бүртгүүлэн хувьцаагаа гаргах (IPO) хүсэлтээ лхагва гарагт өгчээ. Тус компани 75 тэрбум ам.доллар татан төвлөрүүлэхээр зорьж байгаа тул энэхүү IPO нь түүхэнд хамгийн томд тооцогдох IPO болж магадгүй байна. 

Хувьцааг Америкийн "Nasdaq" бирж дээр SPCX гэсэн нэршлээр гаргах бөгөөд арилжаа ирэх зургадугаар сард багтан эхэлж магадгүй байна. "SpaceX"-ээс АНУ-ын Үнэт цаас, биржийн хороонд (SEC) гаргасан хүсэлтэд дурдсанаар, IPO гаргасны дараа Илон Маск компанийн ерөнхий захирал, технологи хариуцсан захирал, Төлөөлөн удирдах зөвлөлийн даргын албан тушаалдаа хэвээр үлдэх аж.

И.Маскийн компани 24 жилийн түүхэндээ анх удаа санхүүгийн нарийн тоо баримтуудаа олон нийтэд ил болголоо. IPO гаргах хүсэлтэд дурдсанаар, 2025 онд "SpaceX"-ийн орлого 18.7 тэрбум долларт хүрсэн байна. Үүний зэрэгцээ компани 2.6 тэрбум долларын үйл ажиллагааны алдагдал хүлээжээ. Энэхүү алдагдал нь тус компани шинэ үеийн пуужингийн хөгжүүлэлт болон хиймэл оюуны технологийн хөгжилд их хэмжээний хөрөнгө оруулалт хийсэнтэй холбоотой аж.

Түүнчлэн "SpaceX" компани ойрын үед шинэ хувьцаа эзэмшигчдэдээ ямар нэгэн ногдол ашиг тараахгүй гэдэг нь баримтуудаас харагдаж байна гэж "Reuters" агентлаг дүгнэжээ. 

"SpaceX" компани 2002 онд байгуулагджээ. Тус компани дахин ашиглах боломжтой пуужингууд болон дэлхий даяар өргөн зурвасын интернэтээр хангадаг 10,000 орчим хиймэл дагуулын сүлжээ бүхий "Starlink" төслөөрөө сансар судлалын салбарт хувьсгал хийсэн юм. И.Маскийн тавиад буй хамгийн том зорилгуудын нэг бол Ангараг гараг дээр хүн төрөлхтний байнгын суурин байгуулах явдал билээ.

Эх сурвалж: DW