Монгол орны зүүн бүсэд шинээр байгуулагдах төмөр замд зэрлэг амьтдад зориулсан гарц байгуулах боломжит газрыг шинжлэх ухааны үндэслэлтэйгээр тодорхойлох зорилгоор Дэлхийн байгаль хамгаалах сан (WWF)-гийн Монгол дахь хөтөлбөрийн газрын мэргэжилтнүүд 2017, 2018 онд нийт 24 цагаан зээр барьж, сансрын дохиолол бүхий хүзүүвч зүүсэн билээ.
Мэргэжилтнүүд 3.5 жилийн хугацаанд хуримтлагдсан өгөгдөлд дүгнэлт хийхэд хүзүүвчтэй цагаан зээр Хэнтий, Дорнод, Сүхбаатар, Дорноговь аймгийн нутагт нийт 247,380.23 км талбайг хамран байршиж байгаа аж.
Мөн хүзүүвчтэй цагаан зээрийн сар бүрийн шилжилт хөдөлгөөнийг дундажлан үзэхэд намрын улиралд их зайд, өвлийн улиралд бага зайд шилжилт хөдөлгөөн хийсэн байна. Энэ нь өвөлжих газраа сонгох гэж намар их нүүдэллэдэгтэй нь холбоотой аж.
Сонирхуулахад, мэргэжилтнүүд 2017 оны нэгдүгээр сараас 2018 оны арванхоёрдугаар сар хүртэлх хугацааны мэдээллийг нягтлахад цагаан зээр хоёр улсын хил дамнан нүүдэллэж байгаа нь тодорхой болсон юм. Дээрх хугацаанд хүзүүвчтэй гурван зээр ОХУ-руу хил дамнан нүүдэллэсэн бөгөөд хоёр нь тодорхой хугацааны дараа Монголд буцаж ирсэн байна.
Тиймээс цагаан зээрийн хил дамнасан нүүдлийн замыг хамгаалах оновчтой менежментийг сонгон нэвтрүүлэх, хэрэгжүүлэх шаардлагатай болж байгаа аж.
