Монголын хөлбөмбөгийн хамгийн нэр хүндтэй тэмцээний нэг 200 сая төгрөгийн шагналын сантай “Мазала” үндэсний дээд лиг улирлаа эхлүүлэхэд бэлэн болжээ.
Сэлэнгэпресс-Хангарьд
Монголын спортын түүхэн дэх хамгийн өндөр шагналын сантай тэмцээн “Мазала” үндэсний дээд лиг бямба гарагийн 14 цагт “Сэлэнгэпресс”, “Хангарьд” багуудын тоглолтоор эхэлнэ. Үндэсний шигшээ багийг дасгалжуулж явсан И.Отгонбаярыг, “Хангарьд”-ын босс М.Отгонбаяр хэрхэн угтах нь хөгжөөн дэмжигчид, хөлбөмбөг сонирхогчдын анхаарлыг татах нь дамжиггүй.
Андууд сити – Дэрэн
Өнгөрсөн жил үндэсний лигт дэвшсэн Г.Даваа-Очир дасгалжуулагчтай “Гоёо Эф Си” энэ улирлаас “Андууд сити” нэрээр дээд лиг хүч үзнэ. Г.Даваа-Очир дасгалжуулагчийн шавь нар өнгөрсөн улиралд аль ч багт амархан өрсөлдөгч биш гэдгээ харуулж чадсан. “Дэрэн”-гийн залуус тэдний 2017-2018 оны улирлын шилдэг тоглолтуудад дүн тавьж, шинэ улиралын өнгийг нь тодорхойлох өрсөлдөгчид билээ.
Эф Си Улаанбаатар – Атлетик 220
Өнгөрсөн жил дээд лигт дэвшсэн эхний жилдээ хүрэл медаль хүртсэн “Атлетик 220” улиралын эхний тоглолтоо эрс шинэчлэгдсэн “Эф Си Улаанбаатар”-тай хийнэ. Нийслэл хотын улаан өмсгөлтнүүд үндэсний шигшээ багийн тоглогчид болох Ц.Мөнх-Эрдэнэ, Ж.Сүндорж, Б.Балжинням зэрэг тоглогчдыг эгнээндээ нэгтгэснээс гадна UEFA PRO ангиллын дасгалжуулагч Марко Ражинигаар багаа удирдуулахаар болжээ. Нэгдүгээр тойргийн хамгийн сонирхолтой тулаан гэгдэж буй “Эф Си Улаанбаатар”, “Атлетик 220” багуудын тоглолтын эхний шүгэл бямба гарагт 20 цагаас дуугарна.
Эрчим - Жипро
Ням гарагт лигийн шинэ цэргүүд өнгөрсөн жилийн алт мөнгөн медальтнуудтай өрсөлдөнө. Эхлээд 16 цагаас үндэсний лигийн 11 удаагийн аварга “Эрчим”-ийн ДЦС-4 талбайд, анх удаа дээд лигт оролцож буй “Жипро” зочлон тоглоно.
Арвис – Улаанбаатар сити
Нэгдүгээр лигт түрүүлэн дээд лигийн эрхийг нүүр бардам авсан “Арвис”-ын залуус жил ирэх тусам хүчирхэгжиж буй “Улаанбаатар сити”-тэй ням гарагт 20 цагаас тоглоно.
Энэ улирлаас эхлэн үндэсний лигийн тоглолтууд оройн цагаар, үзэгчдэд таатай үеэр явагдах учраас та бүхэн МХБХ-ны цэнгэлдэх хүрээлэнг зорьж, багаа дэмжээрэй. Мөн MNB Sport, mycujoo.tv-гээр бүх тоглолтыг шууд хүлээн авч үзэх боломжтой хэмээн Монголын хөлбөмбөгийн холбооноос мэдээллээ.
