Нүүдлийн шувуудын олон улсын өдрийг (International Migratory Bird Day) 1906 оноос хойш жил бүр тэмдэглэж иржээ. Уламжлалаар нүүдлийн шувууд ирэхийг хүлээн энэ өдөр шувууны үүрийг модонд засдаг байна.
Нүүдлийн шувуудын олон улсын өдрийг Нүүдлийн төрлийн конвенци ба Нүүдлийн шувуудын тухай Африк-Азийн хэлэлцээрийн (АЕВА) ивээл дор явуулдаг. Энэ хоёр олон улсын гэрээ нь НҮБ-ын Экологийн хөтөлбөрийн (ЮНЕП) хэсэг юм.
Нүүдлийн шувууд болон тэдгээрийн амьдрах орчныг хамгаалах, шувуудын талаарх олон нийтийн мэдлэг, экологийн боловсролыг дээшлүүлэх, байгаль орчноо хайрлан хамгаалахад татан оролцуулах зорилготойгоор энэ өдрийг тэмдэглэдэг болсон билээ.
Дэлхийн нүүдлийн шувуудын өдрийг 2019 онд «Нүүдлийн шувууд ба хүмүүс хамтдаа он цагийг туулна» гэсэн нь хүн ба шувуу салшгүй холбоотойг онцолж, тэмдэглэн өнгөрүүлж байна.
Монгол улсад одоогийн байдлаар 489 зүйлийн шувуу бүртгэгдсэн байдаг ба шувуудыг суурин амьдралтай, нүүдлийн, дайран өнгөрдөг, өвөлждөг, тохиолдлоор дайрдаг хэмээн ялгадаг байна. Монгол оронд 4 дүгээр сараас эхлэн нүүдлийн шувууд ирдэг байна.
Жимс идэштэн шувууд оройтож, шавьж хорхой идэштэн шувууд нь эрт нүүдэллэдэг юм. Монгол орны шувууд ихэвчлэн 5-6 дугаар сард үүрлэж, үрждэг билээ.
Монгол орны нутаг дэвсгэрээр шувуудын нүүдлийн гурван гол зам дайрдаг ба жил бүр гадаад, дотоодын шувуу ажиглагчид, тэдгээрийн гэрэл зургийг авах сонирхолтой жуулчид шувуудын нүүдлийг ажиглахаар манай улсыг зорин ирсээр байна.
