ОХУ-ын Красноярск хотноо Дэлхийн оюутны спортын өвлийн XXIX Универсиад наадам болж байна. Тус наадамд дэлхийн 58 орны 3800 оюутан тамирчин оролцож байгаа юм. Монголын тамирчид анх удаа спортын таван төрөлд өрсөлдөж байгаагаас уран гулгалтын тамирчин Г.Марал-Эрдэнэ нэгэн түүхийн хуудсыг эхлүүллээ.

Олон улсын эмэгтэйчүүдийн эрхийг хамгаалах өдөр уран гулгалтын эмэгтэй ганцаарчилсан төрлийн уралдаан эхлэж, тамирчид богино үзүүлбэрээ толилуулсан юм. 

Уран гулгалтын эмэгтэйчүүдийн ганцаарчилсан төрлийн богино үзүүлбэрээр 35 тамирчнаас 24 нь чөлөөт үзүүлбэрт өрсөлдөх эрхийг авсан. Манай тамирчин Г.Марал-Эрдэнэ 24.75 оноог авч, 30-р байрт орсноор чөлөөт үзүүлбэрт өрсөлдөх эрхийг хараахан авч чадсангүй.

Энэ төрөлд Япон, ОХУ, Казахстан, Армен, Францын тамирчид 60-аас дээш оноо авч тэргүүлжээ. 

Уран гулгалтын түүхэнд шинэ хуудсыг эхлүүлсэн Г.Марал-Эрдэнэ Япон улсад дасгалжуулагч Козука Сачикогийн удирдлаган дор бэлтгэлээ хийдэг байна. 

Г.Марал-Эрдэнэ нь 5 настайгаасаа Японд амьдарсан, тус улсад суралцахын зэрэгцээ алдарт Мао Асадагийн багт хичээллэж, шоу тоглолтод нь оролцдог тамирчин. Олимпийн мөнгө, дэлхийн 3 алтан медальтай Мао 2017 онд зодог тайлан, одоо “Thanks tour” шоу тоглолт зохион байгуулж байгаа аж. Энэ жил Японы 21 хотод тоглох юм байна. Манай тамирчин эхний 2 шоунд нь оролцоод Универсиад наадамд оролцохоор Красноярскт ирсэн билээ. Мөсөн талбайд монгол хүн гулгаж болохыг дэлхий дахинд харуулж, өвлийн спортын уран гулгалтаар Монголын залуучууд дэлхийд өрсөлдөх боломжтойг Г.Марал-Эрдэнэ охин эхлүүллээ.

Универсиад наадмын уран гулгалтын эмэгтэйчүүдийн ганцаарчилсан төрлийн чөлөөт үзүүлбэр өнөөдөр болж, медальтнууд тодорно.