Индонез улсад 2018 оны наймдугаар сард болсон Азийн зуны спортын XVIII наадмын аварга, МУГТ П.Орхоноос хоритой бодис илэрсэн билээ. Энэ талаар удаан хэлэлцсэний эцэст шийдвэрийг Дэлхийн бөхийн холбооноос албан ёсны хариу гарч, түүний барилдах эрхийг дөрвөн жил буюу 2022 оны есдүгээр сар хүртэл хасахаар болсон байна. Мөн Монголын чөлөөт бөхийн холбоог мөнгөн торгуулиар торгохоор болсон байна. Ийнхүү МУГТ П.Орхон дөрвөн жилийн хугацаанд олон улсын дэвжээнд зодоглох эрхгүй боллоо.

Тэрбээр Индонезид болсон Азийн наадамд 62 кг-ын жинд өрсөлдөж аваргын алтан медаль хүртсэн боловч "stanozolol" хэмээх хориотой бодис хэрэглэсэн нь шинжилгээгээр тогтоогдсон тул аваргын алтан медалиа хураалгасан юм. Уг тэмцээнд Туркменистаны бөх Назароваас мөн допинг илэрсэн юм.

Гавьяат тамирчин П.Орхон Азийн наадмаас хойш ямарч тэмцээнд оролцоогүй бөгөөд 2018 оны ДАШТ-д оролцох байсан ч Дэлхийн бөхийн холбооны шийдвэр гараагүй тул оролцож чадаагүй. Тэрбээр өөрийгөө допингийн төрлийн зүйл хэрэглээгүй гэдгээ хэлж, П.Орхоны багш Ц.Хосбаяр ч ийм зүйл байх учиргүй гэж ярилцлагадаа дурдаж байсан.

2016 оны нэгдүгээр сард ОХУ-д болсон Иван Ярыгиний нэрэмжит “Алтан гранпри” тэмцээний үеэр Японы алдарт бөх Каори Ичогийн ялалтыг зогсоож шуугиантайгаар гарч ирсэн П.Орхон дараа жил нь буюу 2017 онд Дэлхийн аварга болж байсан юм.