Монголын байт харвааны холбооны Ерөнхийлөгч П.Цагаан өнөөдөр Японы Оказаки хотод Японы байт харвааны тамирчидтай хамтарсан бэлтгэл хийхээр мордож буй байтын Үндэсний шигшээ багийн тамирчид, дасгалжуулагч нартай уулзан амжилт хүсч, амжилт дүүрэн ирэхийг ерөөлөө. 

Байт харвааны Үндэсний шигшээ багийн бүрэлдэхүүн хоёр дасгалжуулагч, арван тамирчин нийт 12 хүний бүрэлдэхүүнтэй хөлгийн жолоо залж байна. Манай байтын тамирчид 2020 оны Токиогийн олимпийн өмнө тус улсад гурван удаа Японы тамирчидтай хамтарсан бэлтгэл хийхээр болсон бөгөөд анхны хамтарсан бэлтгэл ийнхүү эхэлж байна.

Багийн бүрэлдэхүүнд багийн ахлагч, ахлах дасгалжуулагч Ю.Ганзориг, туслах дасгалжуулагч Г.Жамъяангомбо, Үндэсний шигшээ багийн тамирчин /эрэгтэй/ ОУХМ Ж.Гантөгс, Б.Адъяасүрэн, Б.Отгонболд, Спортын мастер Б.Пүрэвсүрэн, Ө.Тэнгисболд, Ө.Нэхийт, /эмэгтэй/ ОУХМ Б.Урантунгалаг, А.Энхтуяа, Спортын мастер Б.Мишээлт, Спортын дэд мастер Б.Уянга нар багтаж байгаа юм. 

Тамирчид Япон улсад 18 хоногийн хамтарсан бэлтгэл хийгээд үргэлжлүүлэн Тайланд улсад бэлтгэл хийж, ирэх сарын 24-31-нд Азийн цомын төлөөх тэмцээнд оролцох юм. Азын цомын тэмцээн нь дөрвөн цувралтай бөгөөд манай баг тамирчид эхний тэмцээндээ оролцоно. 

Монголын байт харваан холбооны Ерөнхийлөгч П.Цагаан өнгөрсөн онд Японы Оказаки хотын дарга Ү.Ясүхорид байт харвааны тамирчдаа тус улсад бэлтгэл хийлгэх хүсэлт тавьснаар ноён Ү.Ясүхиро түүний хүсэлтийг хүлээн авч, хоёр тал хамтран ажиллах санамж бичиг байгуулсан билээ.

Байт харваан баг тамирчид Дэлхийн дөрвөн том тэмцээнд оролцохоор төлөвлөж байгаа бөгөөд эхлээд Азийн Цом, дараа нь Турк улсын Анталиа хотод болох Дэлхийн Цомын тэмцээнд оролцох юм. Үргэлжлүүлээд Азийн аварга, Дэлхийн аваргын тэмцээнүүдэд оролцоно.