“Урьхан” Б.Чинбатад 300 гаруй тэмбумаар үнэлэгдэх 520 кг алтаа дээрэмдүүлсэн иргэн В.Ганзоригийг “Ахиж дээрэмдүүлж чадахгүй” гэж хэлснийх нь төлөө шоронд хорьсон шүүх, цагдаагийн албан тушаалтны хэрэг ид дуулиан тарьж байна. Өдгөө 461 дүгээр ангид хоригдож буй иргэн В.Ганзориг шүгэл үлээснээр Монголын Пабло Эскобар “Урьхан” Б.Чинбатын шүүх, цагдаад угсарсан картелийн гишүүдийн нэр ил болоод байгаа юм. 

“Өдрийн сонин”-оос эхлээд Монголын нөлөө бүхий хэвлэлүүд энэ талаар мэдээллэж, баримт, нотолгоотой эрэн сурвалжлах нийтлэл, нэвтрүүлэг бэлтгэж, нийгмээрээ цагдаа, шүүхийнхнийг шүүмжилсэн халуун өдрүүдэд таг чиг гүлдийж суусан Хууль зүйн сайд С.Амарсайхан дөнгөж өчигдөрхөн амь орлоо. Мань эр өчигдөр ЦЕГ-ын дарга Ж.Болдыг дуудан баахан загнаж дүр эсгэв. 

 “Урьхан” Б.Чинбат ба хууль, шүүх, цагдаагийнхны булхайг нотолгоотой дэлгэсэн мэргэжлийн редакцитай мэдээллийн сувгуудын нийтлэл, нэвтрүүлгийг С.Амарсайхан сайд “Сошиалаар яваад байгаа гүтгэлэг” гэж мэдэгдээтэхлээ.  С.Амарсайхан сайд аа, “Урьхан” Б.Чинбат гэж рецедивийн Монголын шүүх, цагдаад угсарчихсан маш том бүлэглэлийг жирийн нэг бизнес эрхлэгч иргэн торны цаанаас зарлачихаад байна. Иргэн В.Ганзоригийн шүгэл үлээсэн  цагдаа, шүүхийнхний нэрсийг Монголын үндэсний өдөр тутмын номер нэг хэвлэл болох “Өдрийн сонин” зарлалаа. Өөрийн гэсэн өнгө төрх байр суурьтай томоохон хэвлэл мэдээллийн хэрэгслүүд энэ хэргийн араас мөшгиж эрэн сурвалжлах нийтлэл, нэвтрүүлгүүд цацаж байна. Гэтэл энэ бүхнийг “Сошиалаар явж буй” гүтгэлэг төдий гэж харж, бухимдаж буйг тань юу гэж ойлгох вэ? 

Таны цаана хууль, шүүх, цагдаагийн том бүлэглэл бий гэсэн шум төрийн ордны тамхины цэг хавиас дуулддаг. Нэр бүхий цагдаагийн хөрөнгөжсөн хурандаагаар удирдуулсан бүлэглэл таны бизнесийг хамгаалдаг гэх жиг жуг их дээгүүр төвшинд яригддаг. Магадгүй иргэн В.Ганзоригийн шүгэл үлээлт таныг хамгаалдаг шүүх, цагдаа, хуулийнхнийг нэрвэж байж мэдэх юм. Ийм шалтгаанаар л та бодит нотолгоотой, Монголын түүхэнд тэр бүр тохиодоггүй том шүгэл үлээлтийг “сошиалын гүтгэлэг, дайралт” гэж зэвүүцэн хүлээж авч байж мэдэх юм. Тийм л биш бол энэ кейс дээр  үг яриа, мэдэгдэл байр сууриа тун болгоомжтой бодож тунгааж хэл, С.Амарсайхан сайд аа. 

“Урьхан” Б.Чинбат ба түүний бүлэглэлийн шүүх, цагдаа нар иргэн рүүгээ дайрч, иргэнийхээ эрхэнд халдаж шоронд хорьчихоод байна. Гэвч Монгол төрийн сайд та эрүүгийн рецедив, мафийн гишүүн шүүгч, цагдаа нар шигээ хохирсон иргэн рүүгээ ингэж дайрч болохгүй. 

Зүй нь Монголын төр дээрэмчдэд дээрэмдүүлж хоригдох хүртлээ хохирч цөхөрчихөөд, амь тавихынхаа өмнө эцсийн аргаа хэрэглэж шүгэл үлээсэн иргэнээ хамгаалах учиртай. Гэтэл монгол төрийн сайд нь цөхөрсөн иргэн рүүгээ эрүүгийн рецедив, мафижсан шүүгч, цагдаа нартайгаа нийлж дайрдаг байж болох юм уу, Ерөнхий сайд Н.Учрал аа. 

“Урьхан” Б.Чинбат гэдэг эрүүгийн рецедивийн гарт шүүх нь төртэйгөө, сайдтайгаа орчихсон юм биш үү, У.Хүрэлсүх Ерөнхийлөгч өө!!!