“UG Экспо” төвд БНХАУ-ын Ляонин мужийн 70 гаруй компани оролцсон экспортын бараа бүтээгдэхүүний үзэсгэлэн, бизнес уулзалт нээлтээ хийлээ. Нээлтийн үйл ажиллагаанд МҮХАҮТ-ын Гүйцэтгэх захирал Ц.Магнайбаатар оролцож, хоёр улсын бизнес эрхлэгчдийн хамтын ажиллагааг өргөжүүлэхэд энэхүү арга хэмжээ чухал ач холбогдолтойг онцоллоо.
Бохайн тэнгисийн эрэгт орших, 42 сая хүн амтай Ляонин муж нь Зүүн хойд Азийг холбосон тээвэр, ложистикийн чухал зангилаа төдийгүй Монгол Улстай хамгийн ойр далайн боомт бүхий стратегийн гарц юм. Энэ удаагийн үзэсгэлэнд барилгын материал, машин механизм, эрчим хүч, ногоон технологи, уул уурхайн тоног төхөөрөмж, металл материал, хүнс, хөдөө аж ахуй, тавилга, нэхмэл зэрэг олон салбарын компаниуд оролцож байна.
Нээлтийн үйл ажиллагааны дараа компани хоорондын B2B уулзалтууд үргэлжилж, Монголын бизнес эрхлэгчид Ляонин мужийн үйлдвэрлэгчидтэй шууд уулзан, худалдаа, хөрөнгө оруулалт, шинэ түншлэлийн боломжуудаа хэлэлцэх юм.
Монгол Улсад 3 дахь удаагаа зохион байгуулагдаж буй тус үзэсгэлэн энэ сарын 30-ныг дуустал UG Expo төвд үргэлжилнэ.
