Иран болон Оман улс Ормузын хоолойгоор худалдааны хөлөг онгоц нэвтрүүлэх түр гарцын байгуулах талаар тохиролцсон гэж Ираны Гадаад хэргийн дэд сайд Казем Гарибабади /2026.08.25/ мэдээлжээ.
Түүний тайлбарласнаар Персийн булан руу орох хөлөг онгоцууд Ираны усан хилээр дамжих бол гарах чиглэлийн зам Оманы усан хилээр үргэлжлэх бөгөөд хоёр чиглэлийн хөдөлгөөний тодорхой хэсэг Ираны усан хилээр дайрах аж. Уг түр гарцыг зөвхөн худалдааны хөлөг онгоц ашиглах бөгөөд байлдааны хөлөг онгоц нэвтрүүлэхгүй гэжээ.
Гарибабади энэ зохицуулалт нь Ормузын хоолойг нэн даруй бүрэн нээж буй хэрэг биш гэдгийг онцлов. Түр гарцыг ашигласны дараа Иран, Оман 30-60 хоногийн хугацаанд байнгын навигацийн шинэ маршрутын талаар хэлэлцэхээр төлөвлөжээ.
Ираны тал Ормузын хоолойг бүрэн нээх асуудлыг тодорхой нөхцөлтэй холбон тавьж байгаа юм. Гарибабадигийн хэлснээр эдгээрт эдийн засгийн бүслэлт, хоригийг цуцлах, Ливаныг оролцуулсан бүс нутгийн мөргөлдөөнийг зогсоох, Йементэй холбоотой бүслэлтийн асуудлыг шийдвэрлэх болон АНУ өмнөх тохиролцоогоор хүлээсэн үүргээ биелүүлэх зэрэг багтаж байна.
Мөн тэрбээр АНУ Ормузын хоолойн олон улсын усан зам дахь минуудыг цэвэрлэсэн гэх мэдэгдлийг няцааж, АНУ-ын мина цэвэрлэгч хөлөг онгоц бүсэд нэвтэрвэл Ираны бай болно хэмээн анхааруулжээ.
АНУ-ын Ерөнхийлөгч Дональд Трамп мөн энэ сарын 25-нд "Ормузын хоолойн олон улсын усан дахь минуудыг цэвэрлэсэн буюу устгасан гэж мэдэгдээд, Иран шинээр мина байрлуулахыг оролдвол тухайн хөлөг онгоцыг устгана" хэмээн анхааруулсан байна.
