Монгол Улсын Ерөнхий сайд бөгөөд Хүүхдийн төлөө үндэсний зөвлөлийн тэргүүн Н.Учралын санаачилгаар хэрэгжиж буй “Хүүхдийн төлөө За бол заавал хийе” үндэсний хөдөлгөөний хүрээнд Гэр бүл, хөдөлмөр, нийгмийн хамгааллын яамны Төрийн нарийн бичгийн дарга А.Даваажаргал аймаг, нийслэл, дүүргийн Засаг дарга нартай цахимаар хуралдлаа.

Хурлаар үндэсний хөдөлгөөний хэрэгжилт, үр дүнг хэлэлцэж, хүүхдийн эрсдэлийг бүртгэх нэгдсэн цахим систем болон түүнийг ашиглах зааварчилгааг Цахим хөгжил, инноваци, харилцаа холбооны яамнаас танилцууллаа. Мөн орон нутгийн удирдлагуудад дараах чиглэлээр үүрэг, зөвлөмж өглөө.

Үүнд:

-Үндэсний хөдөлгөөний хэрэгжилтийг эрчимжүүлж, орон нутагтаа салбар дундын ажлын хэсэг байгуулан нэгдсэн зураглал, календарчилсан төлөвлөгөөг баталж, хэрэгжилтийг зохион байгуулах

-Байгууллага бүр хүүхдийн эрсдэлийг эрт илрүүлэх, бууруулах, хүүхдэд ээлтэй орчин бүрдүүлэх бодитой арга хэмжээ хэрэгжүүлэх

Улсын хэмжээнд бүх байгууллага хүүхэд хамгааллын бодлогоо батлан хэрэгжүүлэхийг орон нутагтаа зохион байгуулах, аргазүйгээр хангах, идэвхжүүлэх

Үндэсний хөдөлгөөний удирдамжид туссан ажил, арга хэмжээг байгууллагын гүйцэтгэлийн төлөвлөгөөнд тусган, хэрэгжилтийг эрчимжүүлэх

Хүүхэд бүрийг эрсдэлээс хамгаалж, аюулгүй, хүүхдэд ээлтэй орчин бүрдүүлэхэд төр, орон нутаг, байгууллага, иргэн бүрийн оролцоог нэмэгдүүлэх нь үндэсний хөдөлгөөний гол зорилго юм.