Цөлжилттэй тэмцэх тухай НҮБ-ын конвенцын Талуудын 17 дугаар бага хурал ес дэх өдрөө үргэлжилж байна. Өнөөдрийн хурлын эхэнд уугуул иргэд, иргэний нийгэм, жендэр болон залуучуудын бүлгийн төлөөлөл оролцсон хэвлэлийн хурал боллоо.
Уг хуралд оролцогчид энэ үеэр хэлэхдээ, Бэлчээрийн доройтол болон уур амьсгалын өөрчлөлтийн нөлөөнд нүүдлийн мал аж ахуй эрхлэгчид, жижиг фермерүүд, загасны аж ахуй эрхлэгчид, тариаланчид зэрэг бүлгийн иргэд хамгийн их өртөж буйг тодотгов. Хэдийгээр дээрх бүлгийн иргэд хохирогч хэдий ч газар нутгаа хамгаалагчид, эко системийг сэргээгчид, газар болон усны менежментийг удирдан чиглүүлэгчид, биологийн олон янз байдлыг хадгалагчид, орон нутгийн хүнсний тогтолцоог бүрдүүлэгчид болохыг тэмдэглэв.
Иймд тэдний хуримтлуулсан олон талт уламжлалт арга ажиллагааны мэдлэг, туршлага, санаа бодлыг хүлээн зөвшөөрч, эрхийг нь хүндэтгэн, утга учиртай оролцоог бүрдүүлэн ижил түвшинд авч үзэх, хүртээмжтэй санхүүжилтийн механизмыг бий болгох, СОР17 бага хурлын үеэрх шийдвэр гаргах үйл явц дахь оролцоог илүү бодитоор хангаж өгөхийг уриаллаа.
Учир нь, дэлхий нийтийн өмнө тулгарч буй бодит хүндрэл бэрхшээлтэй нүүр тулж буй тэдгээр иргэдийн дуу хоолойг сонсохгүйгээр шийдвэр гаргах боломжгүй. СОР17 бага хурлаас гарах шийдвэрийг хэрэгжүүлэх гол хүмүүс бол бид юм гэж хэвлэлийн хуралд оролцогчид ярилаа.
