Гэрэл зургийг montsame.mn
НҮБ-ын Цөлжилттэй тэмцэх суурь конвенцын талуудын 17 дугаар бага хурал (UNCCD COP17)-ын хүрээнд зохион байгуулаж буй “Нүүдэлчин” дэлхийн соёлын фестивалийн албан ёсны нээлт өчигдөр Налайх дүүргийн нутаг дахь Тайж хайрхны бэлд боллоо.
Наадмын нээлтэд Монгол Улсын Ерөнхийлөгч У.Хүрэлсүх оролцож, Их тайзнаа нээлтийн үг хэлсэн бөгөөд Монгол Улсын төрийн дуулал эгшиглэснээр үйл ажиллагаа эхлэв. Ерөнхийлөгчийн хувьд “Нүүдэлчин” фестивалийн нээлтэд анх удаа оролцсон нь энэ. Ерөнхийлөгч У.Хүрэлсүх фестивалийг нээж хэлэхдээ "Энэ наадам бол соёлын биет бус өвийн шавхагдашгүй, давтагдашгүй сан хөмрөг, үнэт зүйлсээ эрхэмлэн дээдэлж, хайрлан хамгаалж, хойч үедээ өвлүүлэх монгол түмний хүсэл эрмэлзлийн илэрхийлэл юм. Монгол Улс нүүдлийн соёл иргэншлийг өвлөн тээж үлдсэн цөөн орны нэгийн хувьд дэлхийн нүүдэлчдийн оюун санааны төв байж, өв соёлыг хадгалан хамгаалах, түгээн дэлгэрүүлэх их үйлсэд манлайлан оролцох учиртай. Миний бие Ерөнхий сайдаар ажиллаж байхдаа санаачилсан энэ наадам жилээс жилд цар хүрээгээ тэлж, дэлхийн соёлын томоохон фестиваль болон өргөжсөнд баяртай байна" гэв.
Түүнчлэн нээлтэд Хууль зүй, дотоод хэргийн сайд С.Амарсайхан, Соёл, спорт, аялал жуулчлал, залуучуудын сайд Ж.Алдаржавхлан, Байгаль орчин, уур амьсгалын өөрчлөлтийн сайд Ц.Сандаг-Очир тэргүүтэй албаныхан оролцсоноос гадна нийслэлийн есөн дүүрэг, 21 аймгийн төлөөлөл, ОХУ-ын Тува, Буриад, Халимаг, БНХАУ-ын Өвөрмонголын өөртөө засах орны монгол туургатнууд ёслолын жагсаалд оролцов.
Нээлтийн үеэр “Нүүдэлчин” фестивалийн Их тайзнаа Үндэсний урлагийн их театрын уртын дуучид, Үндэсний хөгжмийн их найрал хөгжим болон 21 аймгийн уран бүтээлчид Урлагийн гавьяат зүтгэлтэн Э.Мөнхбаярын удирдлага дор “Уяхан замбуу тивийн наран” дууг эгшиглүүлж, “Бадралт Монгол” зэрэг хөгжмийн бүтээлийг толилуулав. Түүнчлэн цам, цацлын 9 хээ, уран нугаралт, морьтны үзүүлбэр, шувуулахуй, анч нохдын үзүүлбэрийг зохион байгууллаа.
Монгол Улсын Ерөнхийлөгч У.Хүрэлсүх Сүхбаатар аймгийн отгийн тоглолтыг үзэж сонирхсон бөгөөд Дүрслэх урлагийн музейн хүрээ, Цомцог гэрт байрлах Алтайн Язгуур хөгжмийн өргөөгөөр зочилж, үндэсний өв соёл, урлагтай танилцлаа. Наадмын талбайд хэл хуур, товшуур зэрэг уламжлалт хөгжмийн зэмсэг, эсгий ширмэл, мод, арьс ширэн эдлэл, уламжлалт тоглоом наадгайг дэлгэж, цаатан, хөсөг, үхэр тэрэг бүхий нүүдэлчдийн ахуйг харуулсан үзүүлбэрүүдийг олон нийтэд танилцуулж байна. Түүнчлэн наадмын талбайд онцлох олон өргөө, отгууд ажиллаж байна. Мөн “Монгол, Италийн бэлчээрийн мал аж ахуйн ертөнц: Уур амьсгалын өөрчлөлт ба орчин үеийн сорилтыг даван туулахуй” олон улсын эрдэм шинжилгээний хурал, “Нүүдэлчдийн өв соёл, шинжлэх ухаан” сэдэвт цуврал лекц болж байна.
Тухайлбал, Сүхбаатар аймгийн отог Дорнод Монголын модон урлал, гэрийн мод, тавилгын дахин давтагдашгүй хээ угалз болон дарьганга, үзэмчин ястны соёл, дуу бүжгийн тоглолтоо толилуулж байна. Тэгвэл Ховд аймаг тус фестивальд Монгол Улсын соёлын биет бус өвийн 4 ай савын 18 өвийн төрлөөр оролцож байна. Үүнээс гадна нутаг нутгийн өвөрмөц онцлогийг харуулсан дуу хуур, тоглоом наадгайг сонирхох боломжтой. Монголчуудын өв соёлыг дэлхийд гайхуулах “Нүүдэлчин” фестиваль маргааш үргэлжлэх бөгөөд сур харваа, морин тэмцээн, үндэсний бөхийн барилдааныг зохион байгуулна.
Манай улс ЮНЕСКО-ийн конвенцын дагуу соёлын өвөө хамгаалах, сурталчлах үүргээ нэр төртэй биелүүлж, Дэлхийн өвийн жагсаалтад 7, Соёлын биет бус өвийн жагсаалтад 17, Олон улсын баримтат өвийн жагсаалтад 7 өвийг бүртгүүлсэн. Хамгийн сүүлд өнгөрсөн 7 дугаар сард БНСУ-ын Пусан хотноо болсон Дэлхийн өвийн хорооны 48 дугаар чуулганаар Хүннүгийн язгууртны дурсгалын цогцолборыг соёлын ангиллаар Дэлхийн өвийн жагсаалтад бүртгүүлсэн юм.
