Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-ын Ногоон бүсийг маргааш албан ёсоор нээнэ.

Иргэдэд нээлттэй Ногоон бүс нь иргэд, хувийн хэвшил, иргэний нийгэм, залуус, эрдэм шинжилгээний байгууллагыг нэг дор холбож, газрын нөхөн сэргээлт, байгальд ээлтэй шийдэл, инновац, сайн туршлага, хамтын ажиллагааг олон нийтэд хүргэх зорилготой. Нээлтийн үеэр Морин хуурын найрал, үндэсний дуу хөгжим, балетын уран бүтээл зэрэг соёл, урлагийн тусгай тоглолтууд болно.

СОР17-гийн өдрүүдэд тус бүсэд 480 гаруй үйл ажиллагааг зохион байгуулах учир иргэд иргэний үнэмлэхийн QR кодыг уншуулж нэвтрэх боломжтой. Энд төрийн болон төрийн бус, иргэний нийгэм, олон нийтийн байгууллага, иргэд байгаль орчны чиглэлээрх 180 төсөл танилцуулж, 110 хэлэлцүүлэг хийж, 1500 орчим илтгэл тавихаар бэлтгэн, байгаль орчин болон бусад чиглэлээр бүтээсэн зургаан киноны нээлт болно.

Түүнчлэн соёл урлагийн тоглолт болж, 21 аймаг өдөр бүр танилцуулга хийж, туршлагаа хуваалцан, Монголын уламжлалт мал аж ахуй, нүүдлийн соёлыг түгээн дэлгэрүүлж, мал аж ахуйн мэдлэг, сайн туршлагаа, байгалийн болон соёлын биет бус өвийг танилцуулах юм. Энд тайзнаас гадна нүүдэлчдийн нутаг, хоол үйлчилгээний хэсэг, хүлээн авах, соёлын өвийн гэрүүд, шинжлэх ухаан, үзэсгэлэн, олон нийт, мэдээллийн лангуу, илтгэл хэлэлцүүлэг болох танхим, хэвлэл мэдээллийн төв бий. Энэ бүсэд болох үйл явдлыг вэб сайтаас гадна гар утсандаа СОР17 аппликейшн суулган хөтөлбөрийг өдөр өдрөөр нь харж мэдээлэл авах боломжтой.

СОР17-гийн хоёр дахь өдөр Талууд газрын доройтол, гантай тэмцэх арга хэмжээний хэрэгжилт, санхүүжилт, шинжлэх ухааны гүйцэтгэх үүргийн талаар хэлэлцэж эхэлнэ. Улс орнууд НҮБ-ын конвенцыг хэрхэн хэрэгжүүлж байгаа, чадавхаа бэхжүүлж буй байдал, газрын доройтол, гантай тэмцэх үйл ажиллагаанд санхүүжилт хэрхэн төвлөрүүлж байгаад анхаарна.

Мөн гангийн төлөвлөлт, дасан зохицол, мэдлэг солилцоо, инновац, мөн Science-Policy Interface, Global Land Outlook-ийн үйл ажиллагааг авч хэлэлцэх юм. Өдрийн турш зохион байгуулах нэмэлт үйл ажиллагаагаар бэлчээр, нүүдлийн мал аж ахуй, санхүүжилт, ган тэсвэрлэх чадвар, газар эзэмшил, эрүүл хөрс, газар, усны харилцан хамаарлыг хэлэлцэхээр төлөвлөжээ.