/Kazinform/ Өчигдөр буюу мягмар гаригт Ливан улсын парламентын гишүүд цаазын ялыг халж, бүх насаар нь хорих ялаар солих тухай хуулийн төслийг дэмжин саналаа өгснийг хүний эрхийг хамгаалах байгууллагууд “түүхэн шийдвэр” хэмээн үнэллээ.
Уг хуулийг парламентын нийт 128 гишүүний олонх нь дэмжсэн бол шиит шашинтнуудын “Хэзболла” бүлэглэлийн фракц эсэргүүцсэн байна. Одоо уг хууль хэд хэдэн процедурыг дамжих бөгөөд эцэст нь Ливаны Ерөнхийлөгч Жозеф Аун гарын үсгээ зурах ёстой.
Хууль хүчин төгөлдөр болсон тохиолдолд Ливан улс цаазын ялыг халсан Ойрх Дорнодын анхны улс болох юм. Тус улсад 2004 оны нэгдүгээр сараас хойш 20 гаруй жилийн хугацаанд цаазын ялыг гүйцэтгээгүй ажээ. Гэхдээ хүн амины хэрэг, эх орноосоо урвах, тагнуул хийх, террорист халдлага үйлдэх, улс орны аюулгүй байдлын эсрэг гэмт хэрэг үйлдэх зэрэгт шүүхээс цаазын ялыг оноосоор байгаа юм.
Ливаны Хууль зүйн сайд Адель Нассар парламентын шийдвэрийг “түүхэн алхам” гэж нэрлэсэн бол Европын Холбооны зүгээс уг шийдвэрийг сайшааж, бүс нутгийн бусад улсад маш чухал үлгэр жишээ үзүүлж байна гэж мэдэгдлээ.
Цаазын ялыг халах тухай энэхүү шийдвэрийг өргөн хүрээнд өршөөл үзүүлэх тухай хуулийн төслийг хэлэлцэж буй гаргасан байна. Зарим хэвлэлд бичсэнээр, террорист халдлагад өртөн амиа алдсан Ливаны цэргийн албан хаагчдын ар гэрийнхэн уг шийдвэрийг эсэргүүцэж байгаа ажээ.
