/Kazinform/ Персийн булан дахь Ираны Харк арал дээр орших баруун терминалаас газрын тос ачиж эхэлсэн тухай Ираны Tasnim агентлаг мэдээллээ. Уг терминал 25 хоногийн турш бүрэн зогссоны эцэст энэ сарын 12-ны өдөр үйл ажиллагаагаа сэргээжээ.

Хиймэл дагуулаас авсан гэрэл зургуудыг харвал, 7 дугаар сарын 11-нээс хойш зангуугаа хаян хүлээлтийн байдалд байсан 333 м урт, нефть тээвэрлэгч VLCC ангиллын хөлөг онгоцонд түүхий нефть ачиж эхэлжээ. Харк арал бол Ираны нефтийн дэд бүтэц байрладаг гол газруудын нэг юм. Арал дээрх терминалуудаар дамжуулан тус улсын нефтийн 90 хувийг экспортолдог байна. Арлын орчмын ус гүн тул газрын тос тээвэрлэгч том танкер хөлөг онгоцуудыг хүлээн авдаг ажээ.

Мөн Ормузын хоолойн ойролцоох Харк арлын орчимд хөлөг онгоцнуудын хөдөлгөөн идэвхжсэн байна. 12-ны өдрийн байдлаар тэнд 35 танкер байсан бөгөөд тэдгээрийн ихэнх нь байршил тогтоох, таних системээ унтраасан байгаа ажээ. Түүнчлэн арлын хойд хэсгийн усанд 36 хөнгөн моторт завь байгаа нь хиймэл дагуулаас авсан гэрэл зурагт харагдах бөгөөд тэдгээр нь хөлөг онгоцуудыг дагалдах, эргүүл хийх үүрэг гүйцэтгэж байгаа бололтой.    

АНУ-ын Ерөнхийлөгч Д.Трамп хэлэхдээ, Америкийн флот Ормузын хоолойг бүрэн хянаж байгаа гэсэн боловч олон хөлөг онгоц тус хоолойн Иранд харьяалагдах хэсгээр нэвтэрсээр байгаа юм. Ормузтай холбоотой маргааныг дипломат арга замаар шийдвэрлэх тодорхой механизм бий болоогүй байгаа бөгөөд АНУ, Ираны талууд өөр өөрийн байр сууринаас ухрахгүй хэвээр байна.