/Kazinform/ Европын зарим бүс нутагт ойн түймэр газар авсаар буй энэ үед Европын Холбооны Иргэний хамгаалалтын механизм /UCPM/ идэвхжиж, тус холбооноос Бельги болон Испанид тусламж илгээжээ. Ялангуяа Бельгид нөхцөл байдал хүнд байна.

Тус улсын Льеж мужийн нутаг дахь Өндөр Фенн хэмээх дархан цаазат газарт 3 мянган га газрыг хамарсан ойн их түймрийг унтраах ажиллагаа явагдаж байна. Гал сөнөөгчдөд сэтгэлийн дэм өгөх, оршин суугчдыг хамгаалах талаар авч буй арга хэмжээтэй газар дээр нь танилцахаар Бельгийн хаан Филипп гамшиг нүүрлэсэн бүс нутагт өчигдөр хүрэлцэн ирсэн байна. Хүлэрт хөрс болон үе үе ширүүсэж буй салхины улмаас гал унтраах ажиллагаа төдийлөн үр дүнд хүрэхгүй байгаа юм.

Уг ажиллагаанд Бельгийн өнцөг булан бүрээс ирсэн 500 гаруй гал сөнөөгч, 120 тусгай техник ажиллаж байна. Тэдэнд туслахаар Шведээс Европын гал сөнөөх rescEU агаарын флотын 2 нисэх онгоц, Нидерланд, Норвег, Германаас тус бүр 2 нисдэг тэргийг илгээжээ. Мөн Францаас Испанид 36 нэгж техник бүхий 104 гал сөнөөгчийг илгээсэн бөгөөд тэд Арагоны бүс нутагт 16 мянган га газрыг хэдийн хамарсан ойн түймэртэй хамтран тэмцэж байна.  

Европын Холбооны “Сopernicus” гэдэг онцгой байдлын албанаас Бельги, Испани, Грек, Герман, Монтенегро, Албани, Франц, Италид дэгдсэн ойн түймрийг унтраахаар ажиллаж буй гал сөнөөгчдөд хиймэл дагуулын гэрэл зургуудыг илгээн тусалж байна. Хямралын үеийн менежмент хариуцсан комиссар Хажа Лахбиб хэлэхдээ “нэг ч улс ойн түймэртэй дангаараа тэмцэх боломжгүй. Манай иргэний хамгаалалтын механизмын хүрээнд илүү шаардлагатай байгаа газрууд руу нисэх онгоц, нисдэг тэргүүдийг илгээж байна. Европын эв нэгдэл хүчтэй гэдэг нь өнгөрсөн амралтын өдрүүдэд Бельги, Испанид дахин харагдлаа” гэв.

Энэ онд Европ даяар ойн түймэр онцгой хүчтэй дэгдэж байгаа бөгөөд долоодугаар сарын эцэс гэхэд ердийнхөөс 2.5 дахин их хэмжээний талбайг хамраад байна.