Боловсролын сайд Л.Энх-Амгалан Хятадын ШУА-ийн Их сургуулийн Тэргүүн дэд Ерөнхийлөгч Янфэн Ван болон бусад албаны төлөөллийг хүлээн авч уулзлаа. Хятадын ШУА-ийн Их сургууль (UCAS) нь судалгааны хүрээлэн, лаборатори, эрдэмтэн, судлаачдын нөөцөд тулгуурлан сургалт, судалгааг хослуулан хөгжүүлдэг БНХАУ-ын тэргүүлэх судалгааны их сургуулиудын нэг юм.
Монгол Улсын ШУА-ийн Их сургууль (UMAS) өнгөрсөн жилээс элсэлтээ авч эхэлсэн. Монгол Улсын Засгийн газар, тухайн үеийн БШУЯ-наас ШУА-ийн эрдэм шинжилгээний мэдлэг, хүний нөөц, судалгааны хүрээлэн, лаборатори, дэд бүтцийн нөөцөд түшиглэн UMAS-ийг байгуулсан ба UCAS-ийн нэгэн адил судалгаанд суурилсан ахисан түвшний боловсролын тогтолцоог хөгжүүлэх зорилготой.
Тиймээс өнөөдрийн уулзалтаар талууд хоёр сургуулийн онцлог, давуу талд тулгуурлан хамтын ажиллагааг өргөжүүлэх боломжийн талаар санал нэгдлээ. Мөн хоёр талын хамтарсан хөтөлбөрөөр залуу эрдэмтдийг бэлтгэх, чадавхжуулах чиглэлээр хамтран ажиллахаар болов.
ШУА-ийн Их сургууль хөтөлбөр, арга зүйн хувьд БНХАУ-ын UCAS-тай ижил зорилго, чиглэлээр хөгжиж байгаа тул хамтарсан хөтөлбөр хэрэгжүүлэх боломжтойг онцоллоо. Түүнчлэн санхүүжилтийн загварыг хоёр тал хамтран судалж, тогтвортой санхүүгийн механизмыг бий болгоход анхаарч ажиллах юм.
