Японы мэргэжлийн сүмо бөхийн Хацү башё өчигдөр өндөрлөлөө. Токио хотод болсон башёгийн сүүлийн өдөр Тамаваши Б.Мөнх-Оргил 13 давж, түрүүллээ.
Тэрээр эзэн хааны цомыг анх удаа хүртэж байгаа бөгөөд Монгол бөхчүүдээс түрүү авсан долоо дахь бөх боллоо. Ингээд монголчуудын нийт башёгийн түрүү 83 болов.
Тамаваши Б.Мөнх-Оргил араас хамгийн ойр даваатай бөх бол сэкивакэ Такакэйшёо байсан бөгөөд тэрбээр 11 даваа, дөрвөн унаатайгаар башёг өндөрлүүлэв. Башёгийн сүүлийн өдрүүдэд их аварга Хакүхо М.Даваажаргал, Тамаваши Б.Мөнх-Оргил нар тэргүүлж эхэлсэн. Хоёр бөх 12 дахь өдөр учраа таарахад Тамаваши давснаар тэдний даваа адил 10 болж тэнцсэн юм. Тэмцээний дундуур ёкозүна Кисэносато зодог тайлж, Хакүхо, Какүрюү аваргууд гэмтсэн нь олон бөхчүүдэд боломж гаргаж өгсөн гэхэд болно. Тамаваши боломжыг ашиглаж, 13 даваа, хоёр унаатайгаар дээд зиндаанд түрүүллээ.
Тамаваши Б.Мөнх-Оргил нь мэргэжлийн сүмод анх 15 жилийн өмнө орж байсан бөгөөд дээд зиндаанд барилдаж эхэлсэн цагаасаа хойш нэг ч башёг өнжиж байгаагүй юм байна. 34 настай тэр Макүүчи зиндаанд хамгийн ахмад настайдаа түрүүлсэн бөхчүүдийн хоёр дугаарт бичигдсэн содон амжилтын эзэн болжээ. Түүний өмнө кёкүтэнхо Н.Цэвэгням бичигддэг бөгөөд 2012 оны тавдугаар сарын башёд 37 настайдаа түрүүлж байсан юм.
Ийнхүү Катаонами дэвжээнээс 48 жилийн дараа түрүү бөх төрж байна. Дашрамд дурьдахад, Тамаваши Б.Мөнх-Оргилыг башёд түрүүлсэн өдөр буюу өчигдөр түүний гэргий хоёр дахь хүүгээ төрүүлжээ.